اوره ک

بیر آه چکیپ اورگیمدن آلیشسام

آلولانیپ آلولارا قاریش سام

کپنک تک اود ایچینده چالیشسام

یانیپ سونوپ کوله دونسم گلرسن؟

اوره گیمی اللریمده ساخلاسام

دوره سینه دسته گوللرباغلاسام

سن گلین جک هاوارچکیپ آغلاسام

آخیپ سوزوپ سئله دونسم گلرسن

تیکسم یولا گوزلریمین قاراسین

یئرساخلاسام اوره گیمین آراسین

سرسم یولا داغین داشین لالاسین

یانیپ سونوپ کوله دونسم گلرسن؟

چیچک چیچک گوله دونسم گلرسن؟

اوره گیمین قانی آخسا گوزومدن

جان قوتارسام بوجان آلان دوزومدن

غزل غزل بال سوزول سه سوزومدن

بولبول اولوپ دیله دونسم گلرسن؟

سیزیلا سام بیر سیزلایان نی اولسام

هارای چکیپ هارایلاراهی اولسام

بیرلحضه یوزچله چکمیش می اولسام

چله چله ائله دونسم گلرسن؟

آچین آققیشقالاری- هوشنگ جعفری زنگانلی

آچین آققیشقالاری
آچین آققیشقالاری ، آچین آققیشقالاری
هاوالار تک اوره ییم دولغوندور
قورویان داغلارا یاغماق دیله ییر
سئل اولوب ظالیم ائوین ییخماغا
آخماق دیله ییر
ایلدیریم تک گئجه باغرین یارا
شاخماق دیله ییر
گونه باخماق دیله ییر
آچین آققیشقالاری
آچین آققیشقالاری
*
منه یوخ
قفس غمده قناری لره بیر رحم ائلهیین
بیر گولون سولماسینا سولمامیشام
قلبیمین دولماسینا دولمامیشام
قورخورام توسکو چالا گولخانانی
آچین آققیشقالاری
آچین آققیشقالاری
*
آچین آققیشقالاری
بیر گؤروم اؤلکه مه ماغا
بیرلشن ائل لر نئج اولوب
کوچه لرده یوموروق توسکورو
بایراق نئج اولوب
بیزیم ائل لر نئج اولوب
آچین آققیشقالاری
آچین آققیشقالاری
*
آچین آققیشقالاری
بو نه یئردی کی ایشیق لیق یولو یوخدور
بیلمیرم قبله م هایاندیر
ائویمین ساغ سولو یوخدور
بیرینی بغض توتوبدور دانیشانمیر
بیری بیر شیردی دوشوب دار قفس ایچره چالیشانمیر
آنا ایستکلی بالاینان بارشانمیر
ایکی تورپاق قاریشانمیر
قول بویونلا ساریشانمیر
آچین آققیشقالاری
آچین آققیشقالاری
*
بابا آچین آققیشقالاری
ائله بیل کی قولاغا وای سه سی گلدی
قاراباغدان اوغول ای وای سه سی گلدی
*
آچین آققیشقالاری
آچین آققیشقالاری
ائله بیل کی قولاغا وای سه سی گلدی
آنالار قالمیش اوغول سوز
اوغول ای وای سه سی گلدی
دییه سن های سه سی گلدی

یا گورون قانلی بئشیک اوخشوری لای لای سه سی گلدی
*
قاپی تاختا ، دالی سالقی ، باجا باغلی ، سه سیم آرقین
نه گئدیر سه س ، نه گلیر های
اولدو کال کلمه لر اوسته عملیم زای
آچین آققیشقالاری

آچین آققیشقالاری

*

آققیشقا : آتیشقا ، جاماکی ، دربچه ، پئنجره ، خیردا پئنجره

آجی باهار

دیدیلر گلیرسه باهاردا گله ر

بولودلارآردیجا گوزیاشی چیله ر

داغلارا چن دوشر.باغچالار گوله ر

گلدی گوزلرینده کدر گتیردی

هره یه بیر ایچیم زه هر گتیردی

قاچیشدیق یولوندا سره ک گول چیچک

سؤغاتین آچماغا چنته سین سؤکک

بویونو اوخشایاق الیندن اوپک

گلدی .اللرینده بیر قوخموش سؤغان

آجیسی.اینسی سی دونیانی بوغان

دیدیلر گئتیریر.هه ریه بیرپای

بیرالینده اولدوز بیر الینده آی

اوبایایلدی بئله بیر های های

اللرین سیخمیشدی اولدوز بوغماغا

سانجیسی.دوتموشدو.نیسگیل دوغماغا

اؤباهار بیر دامجی یاغیش یاغمادی

کیمسه نه محبت سودون ساغمادی

دوداقلار گولمه دی .داماق چاغمادی

اؤگوندن.اؤ.ایله دیاربادیار

ادینی قویدولار.بیر آجی باهار

چاغیرین

چاغیرین جنگه پلنگی

اؤنهنگ اوغلونهنگی

اوخوسون بیر ده لی هنگی

گنه هئی هئی سسی گلسین

اغ اتین شیهه سسی گلسین

چاغیرین سئل کیمی جوشسون

ساوالان مارشی نی قوشسون

ده لی قارتال کیمی جوشسون

گویده قارتال سسی گلسین

غ اتین شیهه سی کلسین

چاغیرین واخت قارالیبدی

نچه شئعرداردا قالیبدی

دوره سین دوشمان آلیبدی

دوسلارین کهنه سی گلسین

آغ آتین شیهه سی گلسین

سوزوکسکیندی قلیشدان

گؤج آلیر ائل بوچیخیشدان

قازانیرشانلی یئغیشدان

ائلیمین اؤز سسی گلسین

آآغ آتین شیهه سی گلسین

چاغیرین تابلو یاراتسین

لالانی قاردا اویاتسین

ائلینین باشین اوجالتسین

اوجالاردان سسی گلسین

آغ آتین شیهه سی گلسین

چاغیرین اوت قالاسینلار

ائلدیریمتک شاخاسینلار

یاشاسینلار یاشاسینلار

ده ده قورقود سسی گلسین

آغ آتین شیهه سی گلسین

آرخاسین آرخالیاق بیز

بیرده تونقال قالیاق بیز

ظلمی کوکدن تالیاق بیز

بابکین نعره سی گلسین

آغ آتین شیهه سی گلسین

اؤلوب اؤزخاقینا وورقون

بغضدان سینه سی توتقون

اولا جاق سونراسی اویغون 

قورتولوش نغمه سی گلسین 

آغ آتین شئهه سی گلسین

چاغیرین اوزلری گلسین

قلمی سوزلری گلسین

حسن نین گوزلری گلسین

گنه قارداش سسی گلسین

 آغ آتین شیهه سی گلسین

ساوالان

اوجا ایلهامیم او قوشلار کیمی کی 

یاز وعده سینده 

قووزانیر ماوی گؤیه تا اوجا باش بیر داغا قونسون 

کؤرپه قارتال کیمی دیر .

گاه چکیلیر گؤزدن ایتینجک

اگله‌‌نیر گاه ساوالان عشقینه-آغدان-آغا قونسون

هر اوجا داغ کی گؤرورسن باشی قارلا آغاراندی 

اورا بیل کی ساوالاندی

آما یوخ!

هر اوجا داغ سسیمی آلسادا تئز قئیته‌ره‌جکدی

سسی قئیترمک همان یئل بیله‌جکدی

آخی یئل یولچودو گئتگین او کی سؤز ساخلایا بیلمز

یئل سؤزو قاپدی قاچیردار اونو کیم هاخلایا بیلمز

یئل گئدرگیندی پیچیللار سؤزو کوللار قولاغیندا 

سؤزو قوربان ائله‌یر قیرنادا قانقال آیاغیندا 

چئویرر سؤز چاناغیندا 

جایالار داغلارا هر بیر سؤزو مین سؤز تؤره‌دندی 

بیلمیرم سیری نه دندی

یئل گئدرگیندی یئلی ساخلاماق اولماز 

یئله بئل باغلاماق اولماز



آما سن ای سؤزو سینه‌نده کؤزردن ساوالانیم 

کیم گله صدقله زرتشت بئجردن ساوالانیم 

ائلیمین شانلی داغی باشیوه مینلرجه دولانیم 

اریدیب ائل غمی بیر یول سنی کؤکدن ده تالانسان 

سئل اولوب قانلی دنیزلرکیمی دونیایه جالانسان 

آدی دیللرده قالانسان 

ساوالانسان ،ساوالانسان

ساوالان ائل غمینی بللی دی ساخلار سینه‌سینده 

سینه‌سی کؤزدو آلودور گیزیریک اینسی سی واردیر نفسینده 

شاعیرین غملی سسینده آل گیلان ساخلا سن ای ائل داغی غملی قفسینده 

ساوالان آلسادا هر سیری سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤکولن داشلاری دیندیر دانیشارلار 

سالسا عاشیق نفسین کوللارا ، کوللار آلیشارلار 

دده قورقود سازی چالسا 

دلی دومرول باش اوجالدار

بلی البته کی یولداش باشینی ،یولداش اوجالدار

سسله عاشیق سازی چالسین

سسیمیز بیرده اوجالسین 

اویناماق لیزگییه دؤنسون

کاس شوشم گوزگویه دؤنسون 

قوی وئرک سس سسه باهم اوخویاق بیر ده کوراوغلو دلی سیندن 

هجرین قوچ نبیسیندن 

او کی ظالیملری مظلوملارین اوستونده ازردی

او کی آسلان کیمی داغلاردا یاتیب باغدا گزردی

اوخو عاشیق اوخو

سن بیل او کی تانری تانییبسان 

سؤزومه دوز جالییبسان 

سوموگوم قوی سازا گلسین 

بولبولوم آوازا گلسین 

یازمیشام ائیوازا گلسین 

گوج آلاق قوی دلی لردن 

باج آلاق اجنبی لردن 

او کی بیلمیر نبی کیمدیر قویون آذر ائلینی مسخره سانسین 

بیر عؤموردور کی فضولی نی – نسیمی نی دانیب ایندی ده دانسین

شهریار تک سن اوجالت باشیوی قوی عرشه دایانسین 

قوی باخار کور تر ایچینده جوموبان اؤلسون –اوتانسین 

او کی آخساقدی یوبانسین 

او کی تورکون دیلین اسکیتمگه تصویره سالیبدیر

او کی تورکون بالاسین ایندی ده آشغالچی سانیبدیر 

او توفاله بیلیرم فیکرینی طاغوتدان آلیبدیر

او رژیمدندی قالیبدیر

یوخسا تورکون بالاسیندان چیخیب علامه‌ی دؤران

اونا دونیا باش اگیر فلسفه‌ده 

بیرجه نه ایران 

قوی دئییم شهریاریمدان 

نیسگیل او چرچی‌‌یه قالسین کی جواهیر نه‌دی ، قانمیر 

فیکری آلداتمادادیر خالقی، ائلین حالینه یانمیر 

اریمیر ، اؤلمور،اوتانمیر

آخی ای قاردا ، دوماندا باش اوجالدان ساوالانیم 

غمی،دونیانی قوجالدان ساوالانیم 

ائل بیلیر داغلار آرا هر اوجا داغلار باشی سن‌سن 

وئر سهنده الیوی قارداشیوین سیرداشی سن سن 

وئرگیلن بیلیک الین بیرده دماونده اونون یولداشی سن‌سن

اوندان آیریلما آماندی

یولوموز چندی دوماندی

قوی ایگیدلر سیزه فخر ائیله‌ییبن باشین اوجالتسین 

قویما قارتال دولانان یئرلره قوزغون الی چاتسین 

ساوالان چنلی چاغیندا

منیم ایلهامیم اولارکن 

کؤنلوم اؤز سیری سؤزون صدق‌ایله سؤیلر ساوالانه 

ساوالان کؤز قالادار شاعیر اولانلار سینه سینده 

اوردا زرتشت گئدیب تانریدان ایلهامین آلانه

اگیرم باش ساوالانه،اگیرم باش ساوالانه