منصوری چکیب عشقی اوْنون داره دئییرلر
مجنوندا دوشوب چؤللره آواره دئییرلر
فرهاد اؤزون اؤلدوردو آغیر تهمته قالدی
هر کیمسه اؤزون اؤلدوره بیچاره دئییرلر
یوسف ده زلیخانی قوْجالتدی نه قوْجالتدی
سالدی اوْنو بیر وصله گؤره ناره دئییرلر
بیلمم نئجه بیر ایشدی کی عشاقی همیشه
بیچاره و آواره و بیکاره دئییرلر
عشق اوْلماسا چایلاردا حزین زومزومه اوْلماز
قارتاللاری قوْنمازلار اوْل داغلاره دئییرلر
بولبولده طبیعتده کی قوشلار کیمی قوشدور
گولدور گئتیره ن تک اوْنو گفتاره دئییرلر
دوْوران دئییشیب ایندی طبیب لرده آلیزلار
درمان ائله یه دردینی بیماره دئییرلر
سرسم دانیشیق عیب اوْلو سئودالیا؟ اوْلماز
یوخ عیبی کی چوخ یئرده آغا، قاره دئییرلر
یاز اینجه غزل سرمد اوزون خاقینه حصر ائت
هر چند گؤزه ل سؤز یازیر ائلناره دئییرلر

یانمیشام هجران اودیلا بی وفا سن بیلمه دین
طعنه لر وئرمیش رقیبیم ناروا سن بیلمه دین
عشق درسین اؤرگشندن مین بلالر چکمیشم
دل بلا، دلبر بلا، عشقیم بلا، سن بیلمه دین
بی وفا لیقلار گؤرندن آشنادن کوسموشم
سن دئمه بیگانه لر میش آشنا سن بیلمه دین
نئیله ییم عؤمروم توکندی غصه غمسیز اولمادیم
همدمیم کی درد اولوبدور مونس نوا سن بیلمه دین
گؤز یاشیم امداد ائدر هردن اونون مدیونیم
خلوتیم چون ائیله ییر چوخ با صفا سن بیلمه دین
او سببدندیر اوپوب هر قطره سین من بوشلارام
اولمایا مندن اودا باری جدا سن بیلمه دین
روزگارین ساز ناسازین دئنن سرمد کئچیب
کوکله مه ک قصدینده یم بوندان صورا سن بیلمه دین

یاد ائیله گولوم سن منی سئودالی گئجه مده
پروانه  اولوم حوسنونه  شیدالی  گئجه مده
آچ لبلرینی غنچه کیمین گول، گوله کؤنلوم
روحوم  دیریله  بلکه  مسیحایی  گئجه مده
سنسیز یوخومو سن بیلیسن عرشه چکیلمیش
بیر ایچکی کیمی مست  ائله رؤیالی گئجه مده
دونیا  منه  زندانه  دؤنوبدو  نئجه  سنسیز
گل گؤر غمی بوسینه ده غوغالی گئجه مده
رخساره  ولی ائتمه  قارا  تئللری افشان

گر چیخماسا جاناندان اؤتور، جان نه یه لازم
جان چیخسا وفا ائتمه سه جانان ، نه یه لازم
بیر یئرده کی هئچ عهده وفا اولمایاجاقمیش
عهدین اونودان یاریله پیمان نه یه لازم
بیر دووریده کی اَیرییلن یوخ دوزه تفریق
بو ترس دولانان کینه لی دوران نه یه لازم
هر درده علاج ائتمه گه درمان اولو لازم
درمان کی اؤزو درددی او درمان نه یه لازم
باخسان گؤره سن عاقلی دیوانه شه رده
مجنونه دئیین چول له بیابان نه یه لازم
انسانلاری کی بیر بیرینی ییرتاجاقیمیش
جنگلده داخی ییرتیجی حیوان نه یه لازم
یکرنگ اولا دوست دونیاده گر قارداشا باشدیر
قارداش کی ایاقدان چکه هر آن نه یه لازم
رزقی کی یئییر هر یارانان حق کرمیندن
اؤز مثلینه هئی ((جان بلی قربان)) نه یه لازم
سرمد اؤزونه تنگ ائله مه سِفله جهانی
زنداندی اؤزو زندگی ، زندان نه یه لازم

دوشموش غم اودو کؤنلومه هیجران یاراشیقدا
گؤز  یاشیمی  روخساره  آخیر قان  یاراشیقدا
سانجیب سینه مه چرخ دنی تیر بلاسین
هئچ  تیر بلا  اولماز او  مژگان  یاراشیقدا
ترسا بالاسی گل  بو قده ر  ترسه  دولانما
امر ائت خاچ آسیم بوینوما صنعان یاراشیقدا
هر جوور ائله سن تابلاشارام وصلینه خاطر
کسسنده اگر باشیمی قوربان  یاراشیقدا
اؤلمه ز بو غریب وطنی دردیده ن ای شوخ
وصلین اولا گر  بیر گئجه  درمان یاراشیقدا
گر گوشه چشمینله نظر قیلسان عزیزیم
بؤرکو  قویارام  یانقلیجی خان  یاراشیقدا
کؤنلوم آچیلار زولف سیاهین کیمی هرده ن
گولسه  او لبین  غنچه  خندان  یاراشیقدا
ناز ائیلمه گل مهمانیم اول گؤز گؤزه اگله ش
بیر چایدا صوزوم من سنه فنجان یاراشیقدا
چوخ عجز ائله دیم فرصتی گل وئرمه رقیبه
آت  گزدیری او  ایندیجه  میدان  یاراشیقدا
سن تک گولو زحمتله بئجردیم یئل آپاردی
ایندی بو منم غصه لی باغبان یاراشیقدا
سرمد چیخاجاق جانیوی حسرت بوجاغیندا
دیللرده  گه زر  شعریوی  هذیان  یاراشیقدا