یاد ائیله گولوم سن منی سئودالی گئجه مده
پروانه  اولوم حوسنونه  شیدالی  گئجه مده
آچ لبلرینی غنچه کیمین گول، گوله کؤنلوم
روحوم  دیریله  بلکه  مسیحایی  گئجه مده
سنسیز یوخومو سن بیلیسن عرشه چکیلمیش
بیر ایچکی کیمی مست  ائله رؤیالی گئجه مده
دونیا  منه  زندانه  دؤنوبدو  نئجه  سنسیز
گل گؤر غمی بوسینه ده غوغالی گئجه مده
رخساره  ولی ائتمه  قارا  تئللری افشان

گر چیخماسا جاناندان اؤتور، جان نه یه لازم
جان چیخسا وفا ائتمه سه جانان ، نه یه لازم
بیر یئرده کی هئچ عهده وفا اولمایاجاقمیش
عهدین اونودان یاریله پیمان نه یه لازم
بیر دووریده کی اَیرییلن یوخ دوزه تفریق
بو ترس دولانان کینه لی دوران نه یه لازم
هر درده علاج ائتمه گه درمان اولو لازم
درمان کی اؤزو درددی او درمان نه یه لازم
باخسان گؤره سن عاقلی دیوانه شه رده
مجنونه دئیین چول له بیابان نه یه لازم
انسانلاری کی بیر بیرینی ییرتاجاقیمیش
جنگلده داخی ییرتیجی حیوان نه یه لازم
یکرنگ اولا دوست دونیاده گر قارداشا باشدیر
قارداش کی ایاقدان چکه هر آن نه یه لازم
رزقی کی یئییر هر یارانان حق کرمیندن
اؤز مثلینه هئی ((جان بلی قربان)) نه یه لازم
سرمد اؤزونه تنگ ائله مه سِفله جهانی
زنداندی اؤزو زندگی ، زندان نه یه لازم

دوشموش غم اودو کؤنلومه هیجران یاراشیقدا
گؤز  یاشیمی  روخساره  آخیر قان  یاراشیقدا
سانجیب سینه مه چرخ دنی تیر بلاسین
هئچ  تیر بلا  اولماز او  مژگان  یاراشیقدا
ترسا بالاسی گل  بو قده ر  ترسه  دولانما
امر ائت خاچ آسیم بوینوما صنعان یاراشیقدا
هر جوور ائله سن تابلاشارام وصلینه خاطر
کسسنده اگر باشیمی قوربان  یاراشیقدا
اؤلمه ز بو غریب وطنی دردیده ن ای شوخ
وصلین اولا گر  بیر گئجه  درمان یاراشیقدا
گر گوشه چشمینله نظر قیلسان عزیزیم
بؤرکو  قویارام  یانقلیجی خان  یاراشیقدا
کؤنلوم آچیلار زولف سیاهین کیمی هرده ن
گولسه  او لبین  غنچه  خندان  یاراشیقدا
ناز ائیلمه گل مهمانیم اول گؤز گؤزه اگله ش
بیر چایدا صوزوم من سنه فنجان یاراشیقدا
چوخ عجز ائله دیم فرصتی گل وئرمه رقیبه
آت  گزدیری او  ایندیجه  میدان  یاراشیقدا
سن تک گولو زحمتله بئجردیم یئل آپاردی
ایندی بو منم غصه لی باغبان یاراشیقدا
سرمد چیخاجاق جانیوی حسرت بوجاغیندا
دیللرده  گه زر  شعریوی  هذیان  یاراشیقدا

گؤزومده دلبرا سن موج اشکی قانه دؤندردین
بو دونیانی فراقیندا منه زندانه دؤندردین
اوْل زلف عنبر افشانی عجب زنجیر عشق ائتدین
دالینجا بوْینوما سالدین منی هر یانه دؤندردین
یاریلدی نار حسرتدن گینه شان – شان اوْلان باغریم
اوْل چین – چین تئللر اوستونده الیکی شانه دؤندردین
اوْل گؤزکی سنده وار بالله سالار یوسفلری جاندان
منِ زارین اوْل گؤزلرله ایشین افغانه دؤندردین
دئدین تسبیحی قیر، قیردیم؛ دئدین زنّاری سال، سالدیم
فقط بیر وصلیدن اؤتری منی صنعانه دؤندردین
منه چوخ – چوخ شیریندیرکی الیندن جام زهر آلسام
دئسه ن کی وعده ی وصلی ندن هیجرانه دؤندردین ؟
رقیبیله گؤرن وقتی سنی کؤنلوم آلوْلاندی
سالیب پاک عشقیمی دیلدن دیله  دستانه دؤندردین
منی اغیار آراسیندا بو قدری بسدی سیندیرما
محبتدن نه گؤردون کی سؤزون بهتانه دؤندردین
نه بیلسین سرمد آخر حسرتیمیش سئوگینین جرمی
اوْنو سن حاصلی تاراج اوْلان باغبانه دؤندردین

فکر ائدردیم یار آنار دردیم ولیکن آنمادی
من یانان تک عشق اوْدوندا یانسین آنجاق یانمادی
گولدو تا من سؤیله دیم غملر چوروتموش جسمیمی