گؤزومده دلبرا سن موج اشکی قانه دؤندردین
بو دونیانی فراقیندا منه زندانه دؤندردین
اوْل زلف عنبر افشانی عجب زنجیر عشق ائتدین
دالینجا بوْینوما سالدین منی هر یانه دؤندردین
یاریلدی نار حسرتدن گینه شان – شان اوْلان باغریم
اوْل چین – چین تئللر اوستونده الیکی شانه دؤندردین
اوْل گؤزکی سنده وار بالله سالار یوسفلری جاندان
منِ زارین اوْل گؤزلرله ایشین افغانه دؤندردین
دئدین تسبیحی قیر، قیردیم؛ دئدین زنّاری سال، سالدیم
فقط بیر وصلیدن اؤتری منی صنعانه دؤندردین
منه چوخ – چوخ شیریندیرکی الیندن جام زهر آلسام
دئسه ن کی وعده ی وصلی ندن هیجرانه دؤندردین ؟
رقیبیله گؤرن وقتی سنی کؤنلوم آلوْلاندی
سالیب پاک عشقیمی دیلدن دیله دستانه دؤندردین
منی اغیار آراسیندا بو قدری بسدی سیندیرما
محبتدن نه گؤردون کی سؤزون بهتانه دؤندردین
نه بیلسین سرمد آخر حسرتیمیش سئوگینین جرمی
اوْنو سن حاصلی تاراج اوْلان باغبانه دؤندردین
فکر ائدردیم یار آنار دردیم ولیکن آنمادی
من یانان تک عشق اوْدوندا یانسین آنجاق یانمادی
گولدو تا من سؤیله دیم غملر چوروتموش جسمیمی
بی وفالیق غملرین اوْل بی وفا غم صانمادی
آلدادیرمیش بیر عؤمور بیر ساختا عیشوه ایلن منی
مرغ دل بیجا یئره خالین گؤروب آلدانمادی
اوز قوْیوب قول تک اؤپنده خاک پاییندن اوْنون
بیر نظر قیقاجی باخدی شکر حقیم دانمادی
داد و فریاد ائتمه گیلن سرمد اوْلماز بیر علاج
کج قانان یارین قاناردی ایسته سیدی قانمادی
آلدادیرمیش بیر عؤمور بیر ساختا عیشوه ایلن منی
مرغ دل بیجا یئره خالین گؤروب آلدانمادی
اوز قوْیوب قول تک اؤپنده خاک پاییندن اوْنون
بیر نظر قیقاجی باخدی شکر حقیم دانمادی
داد و فریاد ائتمه گیلن سرمد اوْلماز بیر علاج
کج قانان یارین قاناردی ایسته سیدی قانمادی
جعفر قره پور
گؤزه لیم سؤیله دیگین عشق و محبت بوائیمیش؟منه وعد ائیله دیگین یوْخسا صداقت بوائیمیش؟
ساتدین اغیاره منی قلبیمه داغلار چکدین
اوْل گؤزه للرده اوْلان اصل و نجابت بوائیمیش؟
قوْیمازیدیم گئده سن لحظه گؤزومده ن اویانا
منی سن ترک ائله دین شرط رفاقت بوائیمیش؟
بیر عؤمور نازینی چکدیم کی یئته م وصلینه من
نازنین لرده مگر عشوه لی وصلت بوائیمیش؟
یئتیشن کامه رقیبیمدی یانان عشقیده، من
نئیله ییم چاره نه دیر بلکه ده قسمت بوائیمیش
مهلت ایستردی ازلدن منه فرصت دئدی وئر
دوشدو فرصت الینه وئردیگی فرصت بوائیمیش
دوزدو غربتده غریبلر کی اؤله ر، جان وئرمز
دوْغما یوردومدا غریبم دئمه غربت بوائیمیش
وقت اؤتوبدور نه گره ک سئوگیلی جانان سرمد
شانسینا اوْغرایاجاق بلکه اوْل لعبت بوائیمیش
یوردداشیم شاعیرجعفر قره پورون (موغانلی سرمد)" سئویملیدیر اوز وطنیم" آدلی کیتابیننان بیر شعر :
"موغـــــــانیم"
دوغما یوردوم وطنیم سن اوزآنامسان موغــــانیم
گوره لیم، یال یاماجین چول چمنین گوللنسیــــــن
آرازین دالغا وورور تورپاغا جان بخش ائلـــــــه ییر
یار، یاماجلار سوایچه سد اوجالیب میللنسیــــــن
سن شرف تورپاغیســان ایرانیمیـــــــن فخر گوزو
سنه خورباخسا هراول گوزکی گوروم کوللنسیــن
سن منیـــم دوغما آنام، منده کی شاعیــــر بالانام
دایاق اول(سرمد)ه سن قوی دیل آچیب دیللنسین