(...)
چاتلاق دوداغلارینین
چاتلاغلارینی
هر دفه
اؤپنده یاغیش داملاسی
عطرینی دویورام
غم یئللرینده ن
اللریم قانداللی
دیلیم سه سوسقون
اؤپوشلر دوداغیمدان
آسیلی قالیر.
**********************************************
آختار
سئوگیلیم ایسته سن تاپاسان منی
قلبینین کؤزه ره ن کؤزونده آختار
گزمه آیریلیغین یاماجین یالین
سونسوز محببتین دوزونده آختار
قوینونا آلاندا گوللر شبنمی
کپنک عشقیله اؤپنده شمی
عاشیقله معشوقون قوووشان دمی
سئوگیده ن دوغولان سؤزونده آختار
نیسگیللی سسینده حزین بولبولون
بوداغی اییلمیش سینان بیر گولون
یاغیش حسرتیله سولان سونبولون
سارالان رنگینده اوزونده آختار
لاله تک اوره گین اولسادا آلقان
اییلمه هیجرانا سینما هئچ زامان
اینامین گؤیونده گونش تک یانان
اومودون پارلایان ایزینده آختار
ماوی گؤزلرینده بوغولان کَسَم
قلبینده عشقیله سسله نن سَسَم
یانیلماز "سیرداشین "اؤزونم دئسم
اؤزونو سئوگیلیم اؤزونده آختار