ایلهام پریسی...
ای گؤزلرینین خیالی منده
بیر پرده آچیب سئحیرلی رویا
شعریم هوسیم سنیله دولدو
کؤک سالدی دیلیمده عشق و سئودا
رویالاریمین حیصاری سن سن
آچ گؤزلرین ای گؤزون سماوی
طوفان قوشو تک قانادلانیم من
دریادی گؤزون و رنگی ماوی
گؤردوک ده سنی دیلیم آچیلدی
دویغوم قلمین گؤزوندن آخدی
اولدوم سنیله واراق واراق شعر
گل شئعیرلریم قالاق قالاق دی
شاعیرلره پای وئرن ده تانری
ایلهام پریسی بیری من اولدوم
تام سئوگی یاتیبدی قوللاریمدا
گل ساخلاماقیندا دای یورولدوم.
------------------------------------------------------------------------------------------------------------------------------------------
آزادلیق قوشوم...
داریخیراوره ییم داریخیر سن سیز
لاپ اوشاق سایاق بهانه گئزیر
بور بوجاق آختاریر هئچ تاپا بیلمیر
نه بیلیم بلکه ده هر نه دن بئزیر
بیلیرسن؟ اوشویور داها اللریم
توتماسان الیمدن سارالیب سوللام
پاییزلار یارپاغیم پاییزلار گونوم
قوجامان سؤیودتک خزله دوللام
(پروینم) آداشیم گؤیلردن باخیر
من توپراق ایچینده سنه باغلی یام
گَل آزادلیق قوشوم من بو توپراغدان
چوخلو گیلئی لییه م چوخلو داغلی یام.
-------------------------------------------------------------------------------------------------------------------------------------------
سئوگی نهایتی...
درین درین آغلار بولاق
گؤزلرینده گیزلنیبدی
آغیر آغیر نیسگیل لرین
سؤزلرینده گیزلنیبدی
سئوگی یولون گئدن نه بول
تکجه سن سن منه قبول
طاقت سیز یول آمانسیز یول
ایزلرینده گیزلنیبدی
سنسن سئوگی نهایتی
دویغولارین اَن دیققتی
مین بیر عشقین محبتی
کؤزلرینده گیزلنیبدی
------------------------------------------------------------------------------------------------------------------------------------------
دَرین منی...
درین منی
یارپیز سایاق
اَزین ایکی داش آراسی
قویون حسرت یاراسینا
بلکه....
توختاق باغیشلادیم..
---------------------------------------------------------------------------------------------------------------------------------------------
قادان آلیم....
سئوگی دنیزینده ، سئوگییه باتدیق
اؤلونجه بیرلیگه ، بیرگه قول آتدیق
نه تئز اوگونلری ، یاددان چیخارتدیق
من یئنه سئویرم بیل قادان آلیم
کئچمیش سئوگیمیزدن ، یالنیز آد قالیب
سنسیزلیک اؤزومو ، اؤزومدن آلیب
حسرتین کؤنلومه ، یانار اود سالیب
اوره ییم اولوبدور کول قادان آلیم
عینادین یول کسیب ، یول باغلایاندا
سؤزلرین کؤنلومو ، هئی داغلایاندا
چیخیلماز قالاراق ، من آغلایاندا
گؤزومون یاشینی سیل قادان آلیم
نه چیخار طعنه دن، یا دا داوادان
آییراق یاخشینی ، دیلله یاوادان
مَثَل دیر بابالار ، دئمیش : یووادان-
-چیخاردار ایلانی ، دیل قادان آلیم
سئوگی دفترینی ، ترسینه واراق
آخیردان اووله ، بیر به بیر ووراق
توتاق محببتلی ، گونلردن سوراق
قاییداق کئچمیشه گَل قادان آلیم
بیر تیکه سئوگیندن ، پای وئر سن منه
(پروین) وورولموشدو ، وورولار یئنه
باشینا دؤنَرَم ، من دؤنه – دؤنه
اؤلَه رم دئسن کی اؤل قادان الیم.
-------------------------------------------------------------------------------------------------
سنه یازماغیم گلمیر....
سنه یازماغیم گلمیر
ایللر بویو
بوتون شاعیرلر سنه شئعیر یازیرلار
بو شئعیرده ن او شئعیره سوزورسن
بال کیمی
هاوا کیمی
سو کیمی
دوداغین قونچه
یاناغین یارپاق
قاشین کامان
کیپریگین اوخ
اهئی ...
من نه یازیم
سنه یازماغیم گلمیر
سنه بوش بیر مئساژیم گلیر
سس سیز
آغ بم بیاض
گؤزونو تیک اَل تئلفونون صحیفه سینه
هئچ کیم بو شئعیری یازماییب
تئکجه من یازیرام
سن اوخو....
-------------------------------------------------------------------------------------------------
تشنه دیر گؤزلریم...
تشنه دیر گؤزلریم ، بیر باخیشینا
هله ده کؤکسومدن ، ایزین گؤیه ریر
آهلاریم قینیندا ، بئلی بوکولوب
غضبلی آخمالار ، منده مله ییر
قاریییب حسرتیم ، آغاردیب ساچی
گوماندا گومانسیز، کؤمه سالیبدی
بویلانیر اؤره کده ، آغری کاروانی
گؤیلردن گونشی ، گوزه ی آلیبدی
کئسیلیب اومودوم ، لعنت ایچینده
لئش لئشه دئییب دی ، دویغو اؤلوسو
باغریمدا هارایدی ، گؤیلره ساری
(پروینین) چیخماقا ، یوخ بیر یولوسو.
-------------------------------------------------------------------------------------------------
غم شکیلی....
حایاتین،
غم شکیلین
چکمک ایسته دیم.
شکیلده،
اؤزوم یاراندیم....
----------------------------------------------------------------------------------------------------------------------------------------------
شاعیر...
نه غملرله ، دونوخوبسان
آختار چالیش ، آرا شاعیر
بیلیرم کی ، بو اینتیظار
چکیر سنی ، دارا شاعیر
بو دونیانین ، آز مردینی
چوخ گؤرموشم ، نامردینی
داشیماقدان ، ائل دردینی
چینیم اولوب ، یارا شاعیر
درد اَلیندن ، اولدوم خسته
دایانمیشام ، سون نَفَسده
درد قالان میش ، قلبیم اؤسته
کؤنلوم اولوب ، پارا شاعیر
بؤلوم بؤلوم ، بؤلوموندن
(پروین) قوخمور ، اؤلوموندن
بو دونیانین ، ظولوموندن
هارا قاچیم ، هارا شاعیر؟
-------------------------------------------------------------------------------------------------
ایتمیشم....
نه تَهَر ساوالان دومانی سئوه ر
او تَهَر سئوگیلیم سئویرم سنی
نئجه خییوو چایی سویا یئریکلر
من یئریکله ییرم بوتون هفته نی
ایتمیشم اؤزومده صفیل سرگردان
اؤزوم اولماقیما اؤزوم تله سیر
نه دئییم اؤزومده من سن اولموشام
گؤزوندن یاغماغا گؤزوم تله سیر
خییالین منیله ائله قاریشیب
بیلمیرم من سنم بیلمیرم دومان
بیلمیرم بولودام بیلمیرم یاغیش
یاهالدیم بیلیرم ( پروینم ) اینان.
-------------------------------------------------------------------------------------------------
هیجران شاختاسی....
کوله یین پارچاسینا باغلادی کؤکسوم سؤزونو
یوللادی سهمان اولان دردله قالانمیش کؤزونو
کاش آچیب بوقچامی کؤنلون گؤره‌سن ایسته‌یینی
باغلاییب یوللایاسان قلبیم اوچون بیر اؤزونو
باخیشیندان اومورام اومماجا چال وئر پاییمی
گئجه دویغومدا بو سن‌سیزلیییمین یوخ دؤزومو
گؤروشون حسرتینه شعره دخیل دوشدو سؤزوم
آی بولود آلتدا اولان تک منه گؤستر اوزونو
هیجرانین شاختاسی «پروین» نئجه یاندیردی منی
هئچ ساغالماز یارالار کئچسه ده عؤمرون یوزونو.
-------------------------------------------------------------------------------------------------
یاندیرما منی...
دئمه کی سئویرم تکجه من سنی
منده چوخ سئویرم سئویرم سنی
اوره ییم باغلی دیر محبتی نه
بوندان چوخ یاندیرما یاندیرما منی
گونه باخان گولو اولموشام سنه
هر سحر یولونا گؤزوم سریلیر
ساری یارپاقلاریم شعرلریمدی
گَل بیر گؤر اَل به اَل نئجه دریلیر
یولونو سوپورره م کیپریک لریمله
بیر چیمدیک غم کده ر قونماسین سنه
سریللم یولونا ایپک خالی تک
آیاقین قویارسان گؤزوم اوستونه.
اوزاق بیر اولدوزلار آدیم دی (پروین)
اوره کدن بیر سنه یوخونام اینان
کؤنلومده کؤک سالیب عشقینین گولو
گَل قویما سارالا قویمایا خزان.
-------------------------------------------------------------------------------------------------
شیطان اؤپوشو...
سیلینمیر یادداشیمدان
آیریلمیر فیکریمدن بیرآن
بو گوندوزو بورونوب گزن گئجه لر.
ملائکه صیفت
آینا اوره ک
تولکو صیفت لرین قوجاقیندا
اَلدن گئدیب ، باشدان اوچان عاغلینا
آلولار گؤیه ریر کؤکسومده منیم.
شیطان اؤپوشونده
میندارلانان دوداقلارین
هاردا سووا چکیب ،دورولاماسیندایام.
یییه سیز دویغولارین
قول قولا باغلانیب
عیفت سیز قبیرینده
مله شیب هؤنکورمه سی
گئجه لر
کیپریکلریمدن آسلانیر.
چوخ ایت اؤز قاپیسینی تانیمیر هله...
عیصمت گونشینی هانسی قول بوداغی دیبدن اوزولموش
اوغورلاییب گؤرن؟
ندن بو باش آچیقلیغا لچک سرمیر
من اؤز بئینیمده
اؤزومه قبیر قازمالییام
بو چاره سیزلیگدن....ا
-------------------------------------------------------------------------------------------------
گیلئیلی دئییلم...
چیخ آییم چیخ گونوم گئجه گوندوزوم
یولونو گؤزله ییر بلکه گله سن
بلکه اؤره ییمی آلاسان اَله
بلکه دردلرینی بیر بیر سیله سن
بو قارانلیق منی ائله سینسیدیر
بیر آددیم قاباقا آتا بیلمیرم
اؤزومده بوغولور سؤزوم صوحبتیم
بیر داملا ایشیقا چاتا بیلمیرم
گیلئیلی دئییلم اؤزون گلمه سن
قیزیل گوللر کیمی عطرینی گؤنده ر
بیر خبر بیر صوحبت ائشیدیم سندن
پاییزدان باهارا فصلیمی دؤنده ر.
--------------------------------------------------------------------------------------------------
ویجدانین آغریسی...
سیخینتی اَلینده اوره ک چیرپینیر
دونیانین دردلری منده یورد سالیب
نیفرتین قبیرین ائشن اوره ییم
گله جک گونلره توم توتوب قالیب
قوووشور گؤز یاشیم دیلک چایینا
سؤیود آغاجی تک سانکی اسیرم
کیریییب قالمیشام ناحاق یولوندا
قرارسیز قراری اؤزوم کسیرم
گناهلار سمانین ائنی بویوندا
ویجدانین آغریسی باغریمی سؤکور
قانیمدان خوللاییر غئیره تین خولو
قلبیمین کونجونده ن هارایلار تؤکور
یانیرام توستومده گؤزوم قاماشیر
دونیانین هر یئری قورخو یوواسی
اَن حقیقت یولو اوزون بیر یولدو
گئده نین دالینجا اولماز دوواسی
زامانین آرخاسین کاشگی سوووشام
اللرین توتام بیر دوشونجه لرین
ناحاققین اووجونو آچیب اَلیمده
قایتارام اؤزونه ایشکئنجه لرین
بو گونوم صاباحا دیل وئریر بئله
حقیقت دیرچه لر ناحاق دیز چؤکه ر
(پروینین) گؤزلری گوله ر طالئعه
عؤمروندن حایاتین عذابین تؤکه ر.
--------------------------------------------------------------------------------------------------
ظولوماتین تینکه سی...
قَهرلرین کوچه سینده ، گولوش گزیر دوداقلاریم
دولاندیغجا اللری بوش ، آلولانیر یاناقلاریم
ظولوماتین تینکه سینی ، قَهر قَهر اوتورموشام
گؤزلریمین اَلین دوتوب ، سیزیلداییر آیاغلاریم
بورویوب دو اوسانیلمیش ، اومودسیزلیق باش آیاغی
باش گؤتوروب گئدیر مندن ، سایسیز اومود قوناقلاریم
گؤزلریمی یوخو آلیر ، بوتون عذاب بئشیگینده
هر نفسده اویادیللار ، سویوق سویوق سازاقلاریم
بو دونیانین فیکیریندن ، کیمسه نی دانلاما (پروین)
بلکه اولا بیرجه آنلیق ، یاخینیندا اوزاقلاریم.
--------------------------------------------------------------------------------------------------
جیغیرلاردا قالان ایز.....
یورغونلوغون نعشی یم
آجی دیللرین یاراسی
دویغولارین
داریسقال کوچه سین ایتمیشه م.
دیلیمه لاللیق موهورو ووروبلارسا،
دونیا بویو اوره ییمین هارایی
ساوالان تیتره دیر.
گؤزومون،
آخار بولاغینین،دؤوره سینده
شعوروم خوللاییر.
مئشه لرین قورخو دسته سینین
آلچاتما شاللاق ایزلری،
قول بوداغیمدادیر.
دوشونجه می اینکیشاف ائدن یوخ.
من...
جیغیرلاردا قالان ایزه م،
وارلیغا ساری.....
--------------------------------------------------------------------------------------------------
تانیش دئییلم...
دویغومون دویغولو دویغولاریندا
حسرتلی گؤزلریم آختاریر سنی
آهلاریم داغ کیمی دایاغیم اولور
فلگین گولوشو یاندیریر منی
باخیرام اؤزومه تانیش دئییلم
غوصصه لر اوزومده جیغیرلار سالیب
ازلدن طالعیم درد اَمه اَمه
سانکی قوجاغینا درد منی آلیب
اود دوتوب یانارکن کؤنلومده ووصال
گولوش دوداغیندا گولوشلر سولور
جان وئریر خیالیم اؤز خیالیندا
سؤزلریم آغزیمدا سانکی بوز اولور
کؤورلیر اوره ییم قووزانیر آهیم
قارغانان آنیما یاغیر گؤز یاشیم
چکَجَک گؤره سن هیجران الیندن
نه قدَر دونیادا بلالر باشیم ؟
گؤزومو تیکیرم کئچمیشلریمه
گونلرین هامیسی غم دی کدَردی
(پروین) قهَرلنمه دردین الیندن
بلکه ایمتحاندی قضا ، قدَردی.
----------------------------------------------------------------------------------------------------------------------------------------------
چرشنبه بایرامی...
بو چرشنبه بایرامیندا،
ساللایاجام اوره ییمی،
اوره یینه ، قورشاق سایاق.
بوش قایتارما
بیر سئویرم آراسینا،
قویوب، سونرا بیر دوگون وور....
----------------------------------------------------------------------------------------------------------------------------------------------- ---
سئوگی پایی...
باخیشیم جانلاندی ، باخیشلاریندان
دونیالار یاراندی ، خومار گؤزوندن
وارلیغیم ایتیردی ، بوتون وارلیغین
دوشونجم دوشوندو ، هر بیر سؤزوندن
یارالی دویغوملا ، آلیشدی اؤرک
سؤزجوک ده اود توتوب، سطیرده یاندی
داددیقجا سئوگینین ، ناکام دادینی
تامسینا تامسینا ، حسرتی قاندی
سن ای سئوگیمیزین ، موقددس آندی
دوشون منده اولان ، هارایی هایی
سن ای عشقیمیزین ، ایزله نن ایزی
سن سیزلیک اولوبدو ، سئوگیمین پایی
عؤمروم اؤز عؤمرونه ، اینانابیلمیر
ووصالی آیریلیق ، چکیبدی دارا
محکوملوق یاشادیر، (پروینه) هیجران
ازلدن طالعیم ، قارا دیر قارا.
------------------------------------------------------------------------------------------------------------------
اوره ییم آغدیر...
ایتگین بیر آغریسان اؤرک باشیندا
بولود گؤزلرینی بیر منه یاغدیر
شئه لسم کؤکسومده ن آغ چیچئک چیخار
باختیم قارا اولسا اؤره ییم آغدیر
دئییرلر سس قالار هاوادا گؤیده
کاش آلا بیله سن بو سس لریمی
گون لریم بیله سن کئچیبدیر نئجه
تانیا بیله سن نفس لریمی
ای منیم دویغومدا یاشیان گولوم
آدلیم پریلردن بیری سی منم
دئولرین اَلیندن گونوم قارادی
چوخلاری اؤلوبدو دیریسی منم...
--------------------------------------------------------------------------------------------------
آیریلیق...
سئوگیمز یولوندا ، یورغوندور ایاغ
حسرتدن سولوبدور ، بو باخچا بو باغ
کاشکی قایید ائیدی ، او گونلر او چاغ
قالانیب کؤنلومده ، اوست اوسته سؤزوم
هله ده یول لاردا ، گؤزله ییر گؤزوم
امیدیم گومانیم ، چئکیلیب دارا
سنسیزلیک قلبیمه ، ووروبدور یارا
آیریلیق دردینی ، آپاریم هارا
قورتاریب طاقتیم ، توکَنیب دؤزوم
هله ده یول لاردا ، گؤزله ییر گؤزوم
ووصالا جان آتیر ، دؤیونور اؤرک
آغ آتلی سئوگیلیم ، ته لس گل گؤرک
سئوگینین دووارین ، یئنیدن هؤرک
اولان محببته ، قوربانام اؤزوم
(پروینم ) یول لاردا ، گؤزله ییر گؤزوم
--------------------------------------------------------------------------------------------------
یوموشالت قلبینی...
اَل به اَل یاپیشاق ، سس سیز سمیرسیز
اؤتورک باش باشا ، آیی ایللری
یاشامین یوخوشون ، هئچ آیریلمایاق
ائنیش لر آرتیراق ، بوتون یوللاری
کوسولو قالماغین ، نه یینه گره ک
ایلان تک ساجماغین ، نه سؤزون دئمک
یوموشالت قلبینی ، گه ل آی داش اوره ک
گولوشدن باغلاییم ، دسته گوللری
آرزولار باریندان ، دَره رم سنی
یاردیغجا کؤکسومو ، گؤره رم سنی
کؤلگه تک عؤمرومه ، سَره رم سنی
قوروسون شماتت ، ائدن دیللری
( پروینم ) بو قده ر چکدیرمه عذاب
نه واردیر طاقتیم نه واریم دیر تاب
قوشمالار شعریمی اوخو منی تاپ
اؤپه رم سئوگیمی دوتان اللری.
--------------------------------------------------------------------------------------------------------------------------------------------
بایاتیلاریم
عزیزیم بویو بسته
آدین قلبیمین اؤسته
اگر قوناق گله سن
آیاقین گؤزوم اؤسته
عزیزیم هئچ دانیشما
هر بیر سؤزه قاریشما
پیس عملین قولوندان
عؤمور بویو یاپیشما
عزیزیم گول اکه رم
سنسیز لیگی چکه رم
هارداسان سا تئز قایید
هیجرانیندان پکه رم
عزیزیم یاز هاواسی
گؤزللیک باش بالاسی
اؤرکدن هئچ پوزولماز
آجی دیلین یاراسی
عزیزیم چیراق یانار
قارانلیق ایشیقلانار
پاخیللارین اؤرگی
هر بیر سؤزله اودلانار
عزیزیم سویوق هاوا
دردیمه سن اول داوا
آیریلیقدان دانیشما
قلبیمه اولماز راوا
عزیزیم گولور یادا
او آتلی من پیادا
وفاسیزا چاره یوخ
دوشسون او یانار اودا
عزیزیم عاشیقم من
داغدا شقاییقم من
گؤنده ر بیزه ائلچینی
اگر سه لایقم من
عزیزیم خومار خومار
غم لرینه گؤز یومار
منیم آغلار گؤزلریم
سندن بیر باخیش اومار
عزیزیم گئدیر هارا
یول توتوبدی داغلارا
دیلی آجی اولانین
دیلیندن چیخسین یارا
آغاجدان آلما دردیم
اؤرگی یئره سئردیم
یاریم بوردان کئچنده
قاچاق توشئیدی دردیم
یاغیش یاغار سئل اولار
مه ده اَسن تئل اولار
پیس اؤلادین اَلینده
تئز بوکولن بئل اولار
عزیزیم مرد آدامی
گؤزلری وار بادامی
پیس دوستیلاگزن کس
اولار نامرد آدامی
عزیزیم آه چکمه رم
هر توخومو اکمه رم
موحتاج اولان زاماندا
ظالیمه باش اگمه رم
عزیزیم بی کسم من
داغلارداکی سَسَم من
دوشمنیمین گؤزونده
بیر آن قویما کوسم من
عزیزیم قاشی کامان
آغزینا گلمز یامان
دوشمن سسین ائشیدجک
دوشمنه وئرمز آمان
قایناق:http://kojanagizi.blogfa.com/