منی ذکر ائتمز ائل، افسانهی- مجنونا مایلدیر
نه بنزر اول منه، دردی اونون درمانه قابلدیر
بیابانلاردا مجنوندان غم و دردیم سوال ائتمین
نه بیلسین بحر حالین اول کی، منزلگاهی ساحلدیر
منیم تک اولا بیلمز شؤهرهی- شهر- بلا مجنون
قبول ائیلرمی بو روسوالیغی هر کیم کی، عاقلدیر
نه موشکل حالی اولسا عاشقین معشوق ائدر چاره
گر اول بیدرد بیلمزسه بو حالی، حال موشکلدیر
فراق ایّامی سئیلاب- سرشکیمدن خبر توتماز
قیامت ماجراسیندان گؤر، اول ظالم نه غافلدیر
فقیه- مدرسه معذوردور انکار- عشق ائتسه
یوخ اؤزگه علمینه انکاریمیز، بو علمه جاهلدیر
فضولی، ائل سنی مجنوندان افزون دئر ملامتده
بونا مونکر دئگیل، مجنون دخی معقوله قایلدیر
* * *
اول پریوش کیم، ملاحت مولکونون سولطانیدیر
حؤکم اونون حؤکمودورور، فرمان اونون فرمانیدیر
سوءردو مجنون نؤبتین، ایندی منم روسوای- عشق
دوغرو دئرلر: هر زامان بیر عاشقین دؤرانیدیر
لحظه- لحظه کؤنلوم اودوندان شررلردیر چیخان
قطره- قطره گؤز تؤکن سانمین سرشکیم قانیدیر
چاکلر جسمیمده تیغ- عشقدن عئیب ائتمهییز
کیم، جنون گوءلزارینین بونلار گوءل- خندانیدیر
ائی فضولی، اولا کیم رحم ائده یار افغانینه
آغلاگیل زار، اونجا کیم، زار آغلاماق امکانیدیر
* * *
منیم کیم، بیر لب- خندان اوءچون گریانلیغیم واردیر
پریشان طوءرّهلر دؤرونده سرگردانلیغیم واردیر
یاشیم تخت- رواندیر، تاج- زرّین شؤعلهی- آهیم
گؤرون کیم، دؤلت- عشق ایله نه سولطانلیغیم واردیر؟
یومولماز اشک طوغیانیندان آنسیز چشم- خونباریم
خیال- صورت- جانانه خوش حئیرانلیغیم واردیر
سرشکیم گؤر، منی، ائی ابر، اؤزوندن کم خیال ائتمه
هوای- عشق ایله مین سنجه اشک افشانلیغیم واردیر
لبین دؤرونده کیم، انسان اولان جان دئر اونا موطلق
اگر آب- حیات ائتسم طلب، حئیوانلیغیم واردیر
فضولی جام- مئی ترکین قیلیب، زؤهد ایله تقوادن
قامو دانایه رؤشندیر بو، کیم، نادانلیغیم واردیر
* * *
ذؤق شؤق ایله جهان قئیدین چکن زحمت چکر
اهل- ذؤق اولدور کیم، اوندان دامن- همّت چکر
گوءن چکر یئردن گؤگه هر دم غوبار- راهینی
توتیا ایچون، بلی، یئردن گؤگه منّت چکر
ائی چکن غئیر ایله پنهان بزم ائدیب مئی گاه- گاه
یاد قیل اوندان کی، بزمین یاد ائدیب حسرت چکر
خالی ائتمیش غئیردن زوءلفون خیالی کؤنلومو
نولا صاحبکشف ایله بیر عؤمردور خلوت چکر
چک، صبوحی، صوءبح نقّاشینه عرض- عارض ائت
بؤیله چکسین، کیم فلک لؤحینه بیر صورت چکر
سروقامتلر سمنروخسارلر تورپاغیدیر
هر صنم کیم، آچیلیر، هر سرو کیم، قامت چکر
قطرهی- اشکیم قطاری، سینه چاکیندن گیریب
تن ائوینه دیشرادان بار- غم و محنت چکر
ائی فضولی، باخمایام تا غئیره، هر خونین موژه
آتشین بیر میلدیر کیم، چشمیمه غئیرت چکر
* * *
هر کتابه کیم، لب- لعلین حدیثی یازهلر
رشتهی- جان بیرله ذؤق اهلی اونو شیرازهلر
بو نه سِردیر، سرّ- عشقین دئمهدن بیر کیمسهیه
شهره دوءشموش «من سنی سئودیم» دئین آوازهلر
شئیخلر مئیخانهدن اوءز دؤندررلر مسجده
بیطریقتلر گرک کیم، دوغرو یولدان آزهلر
چاکلر گؤکسومده، سانمین کیم، آچیبدیر تیغ- عشق
کؤنلومون شهرینه مهرین گیرمگه دروازهلر
ائی فضولی، یار اگر جؤر ائتسه، اوندان اینجیمه
یار جؤرون عاشقه هر دم محبّت تازهلر
* * *
سئیر قیل، گؤر کیم، گوءلوستانین نه آب و تابی وار
هر طرف مین سرو- سرسبز و گوءل- سیرابی وار
پنجهی- برگ- چنار ائتمیش موهیّا شانهلر
آنلامیش گویا کی، سوءنبول کاکلینین تابی وار
راحت ایچون فرش سالمیش سبزهی- تر گوءلشنه
نرگسین گؤرموش گؤزون مخمور، سانمیش خوابی وار
بولونور هر درده ایسترسن، گوءلوستاندا دوا
حؤقّهسینده غؤنچهنین گویا صفا جولاّبی وار
گوءلدو گوءل، آچیلدی نرگس، لاله دولدو ژالهدن
ائی خوش اول کیم، عشرت و عئیش ائتمگه اسبابی وار
غالب اولموش خلقه ذؤق- سئیر- گوءلشن، گوییا
چکمگه خلق بنفشه زوءلفونون قولاّبی وار
گر فضولی مئیل- گوءلزار ائتسه فصل- گوءل، نولا
عئیش اوءچون خونابهی- دلدن شراب- نابی وار
* * *
سرو- آزاد قدین ایله مانا یئکسان گؤرونور
نهیه سرگشته اولان باخسا، خورامان گؤرونور
جان گؤرونمز دئسهلر تنده اینانمان، نیشه کیم
لوءطفدن هر نئجه باخسام تنینه، جان گؤرونور
دئرم احوالیمی جانانه قیلام عرض، ولی
گؤره بیلمن اؤزومو اوندا کی، جانان گؤرونور
ائی دئین: صبر قیل، آه ائیلهمه یاری گؤرجک
منه دوشواردیر اول، گر سنه آسان گؤرونور
سوردوم احوالیمی عشقینده مونجّملردن
باخدیلار طالع ائوینه دئدیلر: قان گؤرونور
نه کماندارسان، ائی مه، کی، آتیب غمزه اوخون
ییخدیغین صئیدده نه زخم، نه پئیکان گؤرونور
بیر صنم زوءلفونه گویا کی، وئریبدیر کؤنلون
کی، فضولینین ایکن حالی پریشان گؤرونور
* * *
سلوک- فقر اطواریم، مزاق- عشق حالیمدیر
تجرّود عالمی سئیرینده عالم پایمالیمدیر
خیالیمدا بودور کیم، بولموشام عالمده بیر خلقت
نه عالم، قانغی خلقت، ساندیغیم باطل خیالیمدیر
جنون فئیضیله آزاد اولموشام قئید- علایقدن
کمال و فضل ترکی، روتبهی- فضل و کمالیمدیر
منم شمع- وصاله یاندیران پروانهوش وارین
فنای- موطلقیم جانان ایله بزم- وصالیمدیر
طبیبا قیلمیشام تشخیص، درد- عشقدیر دردیم
علامت آه- سرد و روی- زرد و اشک- آلیمدیر
هوادن مؤجه گلمیش بحر- دردم، شاهد- حالیم
دل- پور اضطراب و نالهی- بی اعتدالیمدیر
فضولی، عالم- فقر و فناده مونعم- وقتم
دیار- مسکنت، نقد- قناعت موءلک و مالیمدیر
* * *
صفای- وصل قدرین هجر ایله بیمار اولاندان سور
زولال- ذؤق شؤقون تشنهی- دیدار اولاندان سور
لبین سرّین گلیب گؤفتاره، مندن اؤزگهدن سورما
بو پنهان نوکتهنی بیر واقف- اسرار اولاندان سور
گؤزو یاشلیلارین حالین نه بیلسین مردوم- غافل
کواکب سئیرینی شب تا سحر بیدار اولاندان سور
خبرسیز اولما فتّان گؤزلرین جؤرون چکنلردن
خبرسیز مستلر بیدادینی هوشیار اولاندان سور
غمیندن شمع تک یاندیم، صبادن سورما احوالیم
بو احوالی شب- هجران منیمله یار اولاندان سور
خراب- جام- عشقم، نرگس- مستین بیلیر حالیم
خرابات اهلینین حالینی بیر خومّار اولاندان سور
محبّت لذّتیندن بیخبردیر زاهد- غافل
فضولی، عشق ذؤقون، ذؤق- عشقی وار اولاندان سور
* * *
خم آچیلدیقجا زوءلفوندن بلا و محنتیم آرتار
بحمدالله کی، عؤمروم اوزانار، جمعیّتیم آرتار
دئمن[1] اکسیک منی تدریج ایله یاقوت اولان داشدان
بویاندیقجا جگر قانیله قدر و قیمتیم آرتار
توتا گؤر گؤز یولون، ائی اشک، کیم، تمکینیم اسکیکدیر
بو صورتخانهنین گؤردوکجه نقشین حئیرتیم آرتار
مریض- درد- عشقم، ترک- عالمدیر مورادیم کیم،
بو ناخوش موءلکده اگلندیگیمجه زحمتیم آرتار
بوءکولدو قامتیم حسرت یوءکوندن، وه کی، عالمده
اوءمیدیم اکسیلیب هر لحظه یوءز مین، حسرتیم آرتار
نه شربتدیر غمین کیم، ایچدیگیمجه اکسیلیر صبریم
نه سحر ائیلر روخون کیم، باخدیغیمجا رغبتیم آرتار
چوخ اولدوقجا غم و دردیم ره- عشق ایچره خوشحالم
فضولی، شاد اولوب شوءکر ائتمهییممی، نعمتیم آرتار
[1] دئمهیین
***
حوءسنون اولدوقجا فزون، عشق اهلی آرتیق زار اولور
حوءسن نه مقدار اولورسا، عشق اول مقدار اولور
جنّت اوءچون منع ائدن عاشقلری دیداردن
بیلمهمیش کیم، جنّتی عاشقلرین دیدار اولور
عشق دردیندن اولور عاشق مزاجی موستقیم
عاشقین دردینه تیمار ائتسهلر بیمار اولور
زاهد- خودبین نه بیلسین ذؤقینی عشق اهلینین
بیر عجب مئیدیر محبّت کیم، ایچن هوشیار اولور
عشق سئوداسینه صرف ائیلر فضولی عؤمرونو
بیلمزم، بو خواب- غفلتدن قاچان بیدار اولور
* * *
ائی گوءل، نه عجب سلسلهی- مشک- ترین وار
وئی سرو نه خوش جان آلیجی عشوهلرین وار
آجیتدی منی آجی سؤزون توءند نگاهین
ائی نخل- ملاحت نه بلا، تلخ برین وار
پئیکانلاری ایله دولودور چشم- پور آبیم
ائی بحر، ساقینما، سنین آنجاق گوءهرین وار
اول سنگدله نالهی- زارین اثر ائتمیش
ائی دل، سنه بو ذؤق یئتر، تا اثرین وار
عشق ایچره کؤنول دئمه کی، من بیخودم، آنجاق
ائی غافل، اؤزوندن سنین آنجاق خبرین وار؟
دئدیم یئتر، ائت جؤر، چو خاک- رهین اولدوم
دئدی کی، یئتر جؤر سنه تا اثرین وار
چوخ باخدیغینا غمزه ایلن باغرین ازرسن
هر کیمه کی، باخمازسان اونونلا نظرین وار
عشق اهلینه اول ماه، فضولی، نظر ائتمیش
سن هم، اؤزونو گؤستر اگر بیر هوءنرین وار
* * *
لحظه- لحظه لبین آنیب ائدیجک افغانلار
قطره- قطره ساچیلیر دیدهلریمدن قانلار
قطره- قطره دئمه قاندیر کی، چیخار چشمیمدن
دم به دم کؤنلوم اودیله اریین پئیکانلار
قاشلارین یایینه مئیل ائیلهیهلی جان و کؤنول
دوءنو گوءن من بیلیرم کیم، نه چکیرلر آنلار
آچما کاکل گرِهین، باشین اوءچون گؤرمه روا
کی، پریشان اولالار، بیر نئچه سرگردانلار
یئل دگر زوءلفونه یا قویماییب اؤز حالی ایله
گزدیررلر اونو الدن- اله هر دم جانلار
ائیله عوشّاقه جفالر کی، وفالر گؤرهسن
سانما کیم، ضایع اولور ائیلهدیگین احسانلار
سورما زؤهّاده، فضولی، ره و رسمین عشقین
نه بیلیرلر روش- اهل- خرد نادانلار
* * *
تؤکدوکجه قانیمی اوخون، اول آستان ایچر
بیر یئردهیم اسیر کی، تورپاق قان ایچر
اهل- زمانه قانینا چوخ تشنهدیر زمین
قانین کیمین تؤکرسه فلک، اول زمان ایچر
مئی ایچمهدن آچیلماز ایمیش باب- مغفرت
سؤگندلر بو بابده پیر- موغان ایچر
عوقباده کؤثر ایستهمهسین رند- مئیکده
دونیاده بس دئگیلمی مئی- ارغوان ایچر؟
غمزهن گؤرونمهییب گؤزه، قانلار ایچر مودام
زاهد کیمی کی، بادهنی ائلدن نهان ایچر
مئیدن اگر چی تؤبه وئریر ائل فضولیه
ائی سرو، سن قدح سونار اولسان، روان ایچر.
* * *
گیریب مئیخانهیه، موغ مشرب ایله کیم کی، خو ائیلر
اولوب مؤمن، بهشتی، کافرم، گر آرزو ائیلر
مگر دیوانهدیر سئودای- ابروسیله زاهد کیم
باخیب محرابه دایم، اؤز- اؤزیله گوفت و گو ائیلر
دمادم قطره- قطره قان یاشیمدیر کیم، چیخار گؤزدن
و یا پئیکانلارین کیم، آتش- دل اونو سو ائیلر
ره- عشقینده اولمان تنگدل سئودا هجوموندان
طریق- سلطنت هر کیم توتار، غؤغایه خو ائیلر
دئدیم: «کیمدیر پریشان ائیلهین عاشقلر احوالین؟»
صبا گؤستردی تار- سونبول- زوءلفون کی، «بو ائیلر!»
فضولی زوءلفونه باغلاندی، امّا اؤیله اینجَلدی
کی، گویا ضعف اونون هم زوءلفونه بیر تار- مو ائیلر
* * *
ساچین اندیشهسی تحریک- زنجیر- جنونومدور
جنونوم دفعینه ذکر- لب- لعلین فسونومدور
دیار- درد سرگردانییم، هر کیم منی ایستر
دلیل- راه قطره- قطره اشک- لاله گونومدور
فلکده برق- آهیمدن سراسر یاندی کؤکبلر
قالان اودلارا یانمیش کؤکب- بخت- زبونومدور
گلن ناوَکلرین بیر- بیر یاغیب قویماز بولام ذؤقین
منی حرمان اودونا یاندیران سوز- درونومدور
سر- کویینده کؤنلوم برق- آهین سانما بیهوده
قارانغو گئجه عظم- کویین ائتسم، رهنمونومدور
لبی شیرینلرین ذؤقیله فرهادی منم عصرین
یانیمدا جمع اولان سنگ- ملامت بیستونومدور
فضولی، خالی اولماق جام- عئیشیم صاف صهبادن
نشان- بخت- نافرجام و اقبال- نگونومدور
* * *
منده مجنوندان فزون عاشقلیک استعدادی وار
عاشق- صادق منم مجنونون آنجاق آدی وار
نولا قان تؤکمکده ماهر اولسا چشمیم مردومی
نوطفهی- قابلدورور، غمزهن کیمی اوستادی وار
قیل تفاخور کیم، سنین هم وار من تک عاشقین
لیلینین مجنونو، شیرینین اگر فرهادی وار
اهل- تمکینم، منی بنزتمه، ائی گوءل، بوءلبوله
درده یوخ صبری اونون، هر لحظه مین فریادی وار
اؤیله بدحالم کیم، احوالیم گؤرنده شاد اولور
هر کیمین کیم، دؤر جؤروندن دل- ناشادی وار
گزمه ائی کؤنلوم قوشو، غافل فضای- عشقدن
کیم، بو صحرانین گوذرگهلرده چوخ صیّادی وار
ائی فضولی، عشق منعین قیلما ناصحدن قبول
عقل تدبیریدیر اول، سانما کی، بیر بونیادی وار
* * *
موقوّس قاشلارین کیم، وسمه بیرله رنگ توتموشلار
قیلینجلاردیر کی، قانلار تؤکمک ایله جنگ توتموشلار
قیلیب تغییر- صورت وسمه دن یغما قیلیرلار دل
حرامی قاشلارین رسم و ره- نئیرنگ توتموشلار
کؤنول مرآتینی ائیلر موکدّر عقل تکلیفی
خوش اول بیباکلر کیم، ترک نام و ننگ توتموشلار.
فضای- عؤمردن گویا دئگیللر غونچه تک واقف
اولار کیم، اؤزلرین دونیا اوچون دلتنگ توتموشلار.
منم، کیم سنگسار- محنتم بازار- عشق ایچره،
بلا داغی چکن فرهاد ایله هم سنگ توتموشلار.
لبین دؤرونده زاهدلر توتوب مئیخانهلر کوءنجون،
قیلیب تسبیح تارین ترک، زوءلف- چنگ توتموشلار.
سحر بولبوللر افغانی دئگیل بیهوده گوءلشنده،
فضولی نالهی- دلسوزینه آهنگ توتموشلار.
* * *
آشیان- مورغ- دل زوءلف- پریشانیندادیر
قاندا اولسام، ای پری، کؤنلوم سنین یانیندادیر
عشق دردیله خوشام، ال چک علاجیمدان طبیب
قیلما درمان کیم، هلاکیم زهر- درمانیندادیر
چکمه درمان، ناز ائدیب، اوفتادهلردن وهم قیل
گؤگلره آچیلماسین اللر کی، دامانیندادیر
گؤزلریم یاشین گؤروب شور، ائتمه نفرت کیم، بو هم
اول نمکدندیر کی، لعل- شکّر افشانیندادیر
مست- خواب- ناز اولوب جمع ائت دل- صد پارهمی
کیم، اونون هر پارهسی بیر نوک- موژگانیندادیر
بس کی، هجرانیندادیر خاصیّت قطع- حیات
اول حیات اهلینه حئیرانم کی، هجرانیندادیر
ائی فضولی شمع تک موطلق آچیلماز یانمادان
تابلار کیم، سونبولوندن رشتهی- جانیندادیر
* * *
ساقیا جام توت اول عاشقه کیم، قایغولودور
قایغو چکمک نه اوءچون، جام ایله عالم دولودور
تلخ گؤفتارسیز اولماز لب- یار، ائی عاشق
چوخ هوس ائیلهمه اول شربته کیم، آغولودور
قویالیم باشی خوم- باده ایاغینه گلین
توتماماق اولماز اونون حؤرمتینی، بیر اولودور
بونجا کیم، کوه صفت باشیمه داشلار اورولور
دیدهی- بختیم اویانماز نه آغیر اویغولودور
دل- پورخونیمه یاغدیرما بلا پئیکانین
حذر ائت، شیشهیه، ناگه ضرر ائیلر، دولودور
کؤنلومون زخمینه پئیکانینی ائتدیم مرهم
گنج- غمدیر، نولا گر بؤیله دمیر قاپولودور
نرگسین فکری، فضولی، گؤزو کؤنلومده گزر
توتار آهو وطن اول یئرده کی، اوتلو، سولودور
***
قبریم داشینه کیم، غم اودوندان زبانهدیر
طعن اوخون آتما کیم، خطری چوخ نشانهدیر
ائیلر قدح زمانه غمین دفع، غالبا
دؤر- قدح موخالف- دؤر- زمانهدیر
قالدیردی اشک دوءن منی اول آستانهدن
کیم، مقصدیم منیم دخی اول آستانهدیر
واعظ سؤزونه توتما قولاق، غافل اولما کیم
غفلت یوخوسونون سببی اول فسانهدیر
نذر ائتمیشم فراقینه کیم، یوخ نهایتی
نقد- سرشکیمی کی، توءکنمز خزانهدیر
جان وئرمهییممی غوربته کیم، بیم- طعندن
یاد- وطن فغانیما سنسیز بهانهدیر
ائی دل، حذر قیل آتش- آهینله یانماسین
جسمیم کی، درد قوشلارینا آشیانهدیر
مندن، فضولی، ایستهمه اشعار- مدح و ذمّ
من عاشقم، همیشه سؤزوم عاشقانهدیر
* * *
جانی کیم جانانی اوءچون سئوسه، جانانین سئور
جانی اوءچون کیم کی، جانانین سئور، جانین سئور
هر کیمین عالمده مقدارینجادیر تبعینده مئیل
من لب- جانانیمی، خضر آب- حئیوانین سئور
باشه دم دوءشدوکجه تقصیر ائیلهمز، ائیلر مدد
اول سببدن موتّصل چشمیم جگر قانین سئور
مشک- چین آواره اولموشدور وطندن من کیمی
قانسی شوخون، بیلمزم، زوءلف- پریشانین سئور
سو کی، سرگردان گزر، باشیندا واردیر بیر هوا
غالبا، بیر گوءلروخون سرو- خورامانین سئور
عاقبت روسوا اولوب مئی تک، دوءشر خلق آغزینا
کیم کی، بیر سرمست سالی لعل- خندانین سئور
نولاجاقدیر، ترک- عشق ائتمه فضولی، وهم ائدیب
غایتی دئرلر، اولا بیر بنده سولطانین سئور
* * *
مهری کؤنلومده نهان اولدوغون اول ماه بیلیر
کیمسه بیلمز، فوقرا سرّ- دلین شاه بیلیر
سورمان اول ماهیله حال- دلیمی، تانری اوءچون
بیلهلی اونو، اؤزوم بیلمزم، آللاّه بیلیر
گاه یوءز لوءطف، گاه تغافول، گویا
گاه بیلمز بو گرفتارلیغیم، گاه بیلیر
جان فدا ائیلهمگی یارا همین من بیلیرم
بو طریقی دئمه هر غافل و گومراه بیلیر
نظر- لوءطف دریغ ائتمه فضولیدن کیم
سنه صدق ایله اؤزون، بندهی- درگاه بیلیر
* * *
موژهم سرچشمهلر منزل قیلان آشوفته مجنوندور
آنینچون بستهی- زنجیر- سئیل- اشک- گوءلگوندور
سواد- نؤقطهی- گردابه بنزر مردوم- چشمیم
کی، دایم غرقهی- گرداب- چشم- اشک- پورخوندور
ائشیت درد- دلیم افسانهی- مجنونه مئیل ائتمه
کیم، اول افسانهدن هم آنلانان موطلق بو مضموندور
فرح بخش- دل- معشوق اولور شرح- غم- عاشق
سرود- بزم- شیرین نالهی- فرهاد- محزوندور
کمند- چین- زوءلفون وهمی گئتمز زار کؤنلومدن
منه اول رشتهیی اژدر قیلان بیلمهن نه افسوندور
خمیده قامتیم کیم، داغ- دلدن قانه غرق اولموش
ایچینده نؤقطهسی گویا کی، قان آلتینداکی نوندور
فضولی، وئرمهدی طعن اوخلاری گؤز یاشینه تسکین
اؤنون بند ائتمک اولماز خار و خاشاک ایله، جئیحوندور
* * *
غوبار- سجدهی- راهین، خط- لؤح- جبینیمدیر
سجود- درگهین سرمایهی- دونیا و دینیمدیر
اگر عظم- ره ائتسم، شؤق- وصلین هادی- راهیم
و گر آرام هم دوتسام، خیالین همنشینیمدیر
هوای- رؤضهی- کویین، باهار- گوءلشن- جانیم
نهال- قامتین سرویم، عوذارین یاسمینیمدیر
یقینیمدیر کی، مقصودوم اولور حاصل سنه یئتسم
بحمدالله، منه سندن یانا رهبر یقینیمدیر
طلب کار- وصالم، موژدهی- وصلین دریغ ائتمه
کیم، اول موژده فرح بخش- دل- اندوهگینیمدیر
چیخاردی ذؤق- وصلین خاطریمدن رؤضه پرواسین
سؤزون کؤثر، مونوّر مجلسین خوءلد- برینیمدیر
منه اوءز گؤسترر هر لحظه یوءز مین شاهد- دؤلت
چو مرآت- روخون، منظور- چشم- پاک بینیمدیر
سریر- سلطنت ذؤقیندن افزوندور منه اول سؤز
کی، لوءطف ایلن دئمیشسن: بیر غولام- کمترینیمدیر
بری اولدوم، فضولی، غئیردن، اول دلروبا آنجاق
انیسیم، مونسیم، یاریم، نگاریم، نازنینیمدیر
* * *
دئمیش هر غؤنچهیه عاشقلیگین رازین صبا دئرلر
ائل آغزین توتماق اولماز، قورخورام، ائی گوءل سانا دئرلر
اسیر- درد- عشق و مست- جام- حوءسن چوخ امّا
بیزوز مشهور اولان، لئیلی سنه، مجنون مانا دئرلر
سنین مهر و وفا گؤستردیگین اغیاره چوخ گؤردوم
غلطدیر کیم، سنی بی مهر اوخورلار، بی وفا دئرلر
سنه دئرلر بوءت- چین، زوءلفونه زونّار سؤیلرلر
زهی ایمانی یوخلار کوءفر سؤیلرلر، خطا دئرلر
منه دئرلردی اوّل: بیر ملکدیر سئودیگین، حالا
گؤرنلر، من فقیره گؤیدن ائنمیش بیر بلا دئرلر
مریض- عشق عقد- زوءلفون ائیلر آرزو، زیرا
موعالجلر بو موهلک درده موءشکلدیر دوا دئرلر
فضولی، عاشقه اونلار کی، دئرلر ترک- عشق ائیله
دئمزلرمی خطا، تغییر قیل حؤکم- قضا دئرلر
* * *
صبادن گوءل اوءزونده سوءنبول- پور پیچ و تاب اوینار
ساناسان پر آچیب، گوءلشنده بیر مشکین غوراب اوینار
خیال- عارضین جؤلان ائدر بو چشم- پور نمده
نچون کیم، مؤجلنمیش سودا عکس- آفتاب اوینار
روخون گؤرگج اولور سوز-درون و دود- دل حاصل
بهار ایّامی سیچرار برق- رخشنده، صحاب اوینار
ایراق اولسون یامان گؤزدن، نه خوش ساعتدیر اول ساعت
کی، معشوق ایله عاشق ائیلهییب ناز و عتاب اوینار
ریای- زاهد- خوشکون سماعیندن نولور حاصل
خوش اول کیم، رند- مئیخواره، ایچیب جام- شراب اوینار
بو غملر کیم، منیم واردیر، بعیرین باشینا قویسان
چیخار کافر جهنّمدن، گوءلر اهل- عذاب اوینار
قیلیر گؤز پردهسین خوناب- حسرت چاک هر دم کیم
روخونده لذّت- دیدار ذؤقیندن نقاب اوینار
فضولی رشکدن تیترر دل- پور خونی عوشّاقین
بناگوشینده یارین هر زامان کیم، لعل- ناب اوینار
* * *
آه ائیلهدیگیم سرو- خورامانین اوءچوندور
قان آغلادیغیم غؤنچهی- خندانین اوءچوندور
سرگشتهلیگیم کاکل- مشکینین اوجوندان
آشوفتهلیگیم زوءلف- پریشانین اوءچوندور
بیمار تنیم نرگس- مستین المیندن
خونین جگریم لعل- دور افشانین اوءچوندور
یاقدیم تنیمی وصل گوءنو شمع تک، امّا
بیل کیم، بو تداروک شب- هجرانین اوءچوندور
قورتارماغا یغمای- غمیندن دل و جانی
سعییم نظر- نرگس- فتّانین اوءچوندور
جان وئر کؤنول، اول غمزهیه کیم، بونجا زامانلار
جان ایچره سنی بسلهدیگیم آنین اوءچوندور
واعظ بیز دوءن دوزخی وصف ائتدی، فضولی
اول وصف سنین کولبهی- احزانین اوءچوندور
* * *
قانسی گوءلشن گوءلبونی سرو- خورامانینجا وار؟
قانسی گوءلبون اوءزره غؤنچه، لعل- خندانینجا وار؟
قانسی گوءلزار ایچره بیر گوءل آچیلیر حوءسنون کیمی
قانسی گوءل برگی لب- لعل- دوءر افشانینجا وار؟
قانسی باغین وار بیر نخلی، قدین تک بارور
قانسی نخلین حاصلی سیب- زنخدانینجا وار؟
قانسی خونی سن کیمی جلاّده اولموشدور اسیر
قانسی جلاّدین قیلینجی تیغ- موژگانینجا وار؟
قانسی بزم اولموش مونوّر بیر قدین تک شمعدن
قانسی شمعین شؤعلهسی روخسار- تابانینجا وار؟
قانسی یئرده بولونور نسبت سنه بیر گنج- حوءسن
قانسی گنجین اژدری زوءلف- پریشانینجا وار؟
قانسی گوءلشن بوءلبولون دئرلر، فضولی، سن کیمی،
قانسی بوءلبولون سرودی آه و افغانینجا وار؟
* * *
وه نه قامت، نه قیامتف بو نه شاخ- گوءل- تردیر؟
نه بلادیر نظر اهلینه، نه خوش مدّ- نظردیر؟
گؤز یولودور کی، کؤنول موءلکونه خوبلار گیرر اوندان
توتما، ائی اشک، اونو بالله کی، عجب راهگوذردیر
نه گؤهر بولسا بگنمز، بوراخیر یازییا دریا
غالبا، کیم اونا مقصود دیشین کیمی گؤهردیر
عشق عئیبینی بیلیبسن هونر، ائی زاهد- غافل
هونرین عئیبدیر، امّا دئدیگین عئیب هونردیر
ستمین گرچی یاماندیر، اونو ترک ائیلهمه بالله
کی، تغافول ستمیندن دخی البتّه بتردیر
آخر اولماز نئجه کیم، گؤز یاشی آخارسا، همانا
کی، دمادم اونا امداد قیلان خون- جگردیر
سرسری باسما قدم عشق طریقینه، فضولی
احتیاط ائیله کی، غایتده خطرناک سفردیر
***
نالهدندیر نئی کیمی آوازهی- عشقیم بولند
ناله ترکین قیلمازام نئی تک کسیلسم بند بند
قیل مدد، ائی بخت، ور نه، کام- دل مومکون دئگیل
بؤیله کیم، اول دلروبا بی درددیر، من دردمند
داغلردیر اودلو کؤنلومده قاراسی قوپمامیش
یا ثبات- عشق اوءچون اود اوءزره بیر نئچه سپند
آچیلیر کؤنلوم گهی کیم، گریهی- تلخیم گؤروب
آچار اول گوءلروخ تبسّوم بیرله لعل- نوشخند
خاک- راهیندن منی قالدیرا بیلمز سایه تک
قیلسا گردون آفتابین هر شوعاعین بیر کمند
جام توت، دئر، ساقی- گوءلچهره، زاهد، ترک- جام
ائی کؤنول فکر ائیله کیم، قانسیدیر توتمالی پند
ائی فضولی، صورت- فقرین قبول- دوستدور
هیچ درویشی سنین تک گؤرمهدیم سولطانپسند
* * *
گؤز خطیندن مردومین محو ائتمهدن بولماز موراد
ضایئع ائیلر حوءسنونو خطّین سواد اوءزره سواد
اولا بیلمز چین- زوءلفوندن جودا گؤز مردومی
جاری اولموشدور بو عادتف طورّهسیز اولماز مداد
کؤنلون آهیمدن ترحّوم صورتین گؤستردی، لئیک
مؤجدن سو نقشینه چوخ ائتمک اولماز اعتماد
اشک و آهیم نفرتی قطع ائتدی ائلدن اوءلفتین
کئچدی تندن اوخلارین، تنها قالیب دل دم به دم
نالهلر ائیلر، کئچن همدملرین ائتدیکجه یاد
چاک- سینهمدن کؤنول چیخدیقجا شاد اولسون نولا
اؤیله آفتدن یاخاسین قورتاران اولمازمی شاد؟
شیوهی- شمشاد قدّین گؤرسه ائیلر باغبان
اعتدال- سرودن البتّه صلب- اعتماد
قویما ناقص اهل- درد ایچره فضولینی طبیب
ائیله بیر درمان کی، دردین ائده گوءن گوءندن زیاد
* * *
ائی مزاق- جانه جؤرون شهد و شکّر تک لذیذ
دم به دم زهر- غمین قند- موکرّر تک لذیذ
آتش- برق- فراقین نار- دوزخ تک الیم
جورعهی- جام- وصالین نار- دوزخ تک لذیذ
ششرح- احوالیم سنه مسته نصیحت کیمی تلخ
تلخ گؤفتارین منه مخموره ساغر تک لذیذ
داغ- عشقین دردی ذؤق- سلطنت تک دلپذیر
خاک- کویین سئیری فتح- هفت کشور تک لذیذ
نولا بولسام ذؤق گؤیدوردوکجه سینهم اوءزره داغ
اهل- درده داغ اولور، بیدرده زیور تک لذیذ
تازه- تازه داغ- دردیندیر دل- سوزانیمه
فالمثل، حرص اهلینه جمعیّت- زر تک لذیذ
ائی فضولی، عالمین گؤردوم قامو نعمتلرین
هیچ نعمت گؤرمهدیم دیدار- دلبر تک لذیذ
* * *
جلوهی- عکس- روخون آیینهده ائی اشک- حور
رؤشن ائتمیش اونو کیم، خورشیددندیر آیه نور
برق- آهیم گؤی اوءزون توتموش، سرشکیم یئر اوءزون
صؤحبتیمدن هم وحوش ائتمیش تنفّور، هم طیور
عشق رسمی گر بودور، موشکل یئتر درمانه درد
درد اهلی بی زبان، بی دردلر مست- غرور
داغ- دلسوز- فراقین قیلدی گوءن- گوءندن فزون
نور- ماه افزون اولور، خورشیددن اولدوقجا دور
وعدهی- وصلین چوخ، امّا بخت یار اولماز، نه سود
گوءل گتیرمز، آب- شیرین وئرمک ایله خاک- شور
تار- زوءلفوندورمو روخساریندا جانلار مسکنی
یا بوراخمیش بیر ره- پور پیچ و خم گوءلزاره مور
اول سر- کوی ایتلری ایچره، فضولی، یوخ یئریم
بس منه ماتمسرا، من قاندا و بزم- سرور؟
* * *
یانان عشق آتشینه آتش- دوزخدن ایمندیر
نه کیم، بیر گز یانار، یاندیرماق اونو غئیر- مومکندیر
بوراقدیم ذؤرق- دل عشق بحرینه، ساقین ائی مه
تموّج وئرمهسین تشویش اونا کیم، اوندا ساکندیر
دهانین دورجونو خال- لبین گؤزدن نهان ائتمیش
امانت گؤر کی، هندو مخزن- لؤلؤیه خازندیر
غمین کیم، تؤکدو قانیم، دلده ساکن اولدوغون بیلدیم
کی خلوت چکمگین تأثیری سرّ- کشفی باطندیر
جگر داغینه مرهم اولدو پئیکانین بحمدالله
سعادت کؤکبینه اختر- بختیم موقارندیر
روخوندن نور اوغورلار شمع، باشین کسسهلر جایز
بودور بیر قول سرانجامی کی، سولطانینه خایندیر
فضولی، خالی اولماز صورت- دل دوست فکریندن
بو معنیدن کی، بئیتالله، دئیرلر قلب- مؤمندیر
* * *
چشم- صورت بازیمه موژگان صفی هنگامهدیر
قانه باتمیش هر موژهم بیر شوخ- گوءلگونجامهدیر
گؤسترر هر دم علامتلر قیامتدن قدین
قایم ائتمیش حشر بورهانین، عجب علاّمهدیر
تا خطین اوءزره خم- ابرولرین سرگرمییم
هر سؤزوم درد- دل املاسینه بیر سرنامهدیر
اوءزده نقش- خون- دل راز- نهانیم فاش ائدر
شرح- غم تحریرینه هر کیپریگیم بیر خامهدیر
دردیم اولدور کیم، موسلمان اولموش اول ترسابچه
کوءفره اولان ظوءلملر طعنی بو گوءن اسلامهدیر
ائی صبا، رحم ائت کیم، اول بی درد قیلمیش ترک- جؤر
چارهی- درد- دلیم مؤقوف بیر اعلامهدیر
ائی فضولی، بولمادیم رنگ- ریادن بیر صفا
نولا گر مئیلیم بو رنگ ایله مئی- گوءلفامهدیر
* * *
صبوح اوءچون منه دوءرد- مئی- شبانه یئتر
اثر کی وار، خراب اولماغا بهانه یئتر
جفا اوخون منه یاغدیرمان آنجاق، ائی افلاک
دئمین کی، یئددی کمانداره بیر نشانه یئتر
بیانه یئتمگه درد و غمیم فسانهلری
زبانیم آتش- دلدن چیخان زبانه یئتر
قوپاردی مردوم- چشمیم کؤنول بناسین کیم
حوباب- اشک هوا نقدینه خزانه یئتر
لبین خیالی ایله پاره- پاره اولدو جگر
گواه- حال منه اشک- دانه- دانه یئتر
حریف- بزم- غمیم، خون- دل شرابیم اولوب
ترانهی- طربیم آه- عاشقانه یئتر
فضولی، ایستهمزم مسند- جم و جمشید
منه نشیمن – دؤلت شرابخانه یئتر
* * *
گه گؤزده، گه کؤنولده خدنگین مکان توتار
هر قاندا اولسا قانلینی، البتّه قان توتار
دل چکسه، نولا جان و تنی خاک- کویینه
خار و خس ایستر اوندا کی، قوش آشیان توتار
ذکر- لبینله زوءلفونه جان بولدو دسترس
اونون کیمی کی، اوخویوب افسون ایلان توتار
دل توتدو غؤنچه ایله برابر دهانینی
بو عقل- ناقص ایله اؤزون خورده دان توتار
خورشید خرمنینه اوُرا شؤعله- شؤعله اود
آهیم کی، لحظه- لحظه ره- آسمان توتار
جان ائیلهدیکجه مئیل- تماشای- قامتین
گؤز رؤزنین سرشک- روانیم روان توتار
توتماق دیلر قاپیندا فضولی مقام، لئیک
بو سرّی کیمسهیه آچا بیلمز، نهان توتار
* * *
خوشام کیم دم به دم گریان گؤزوم اول خاک- پادندیر
زیانی اولماز اول گؤز یاشینین کیم، توتیادندیر
دمادم مردوم- چشمیم ایچر قان زوءلف و خالیندان
بلی اکثر معاشی اهل- دریانین قرادندیر
دئمه فرهاد قانین تؤکموش آنجاق عشق شمشیری
منیم گؤر قانلی یاشیم کیم، بو هم اول ماجرادندیر
موعنبر سونبولوندن آلمادان بو، اولمادیم روسوا
بو روسوالیق منه سندن دئگیل، باد- صبادندیر
حوباب- اشک ایچینده موی- ژولیدهمله خوشحالم
باشیمدا بو هومایون سایه اول عالی بنادندیر
وفا رسمین اونوتموشسان دئیه، اینجینمزم زیرا
بو کیم، مندن جفا کم ائیلهمزسن هم وفادندیر
کلام- حوءسن- مشرب، عاری اولماقدیر تعرّوضدن
ریا اهلینه هم چوخ اعتراض ائتمک ریادندیر
فضولی، تؤکمه چوخ یاش، احتیاط ائت گئتمهسین ناگه
گؤزوندن سوءرمه کیم، خاک- ره- اهل- صفادندیر
* * *
پریشان خلق- عالم آه و افغان ائتدیگیمدندیر
پریشان اولدوغوم، خلقی پریشان ائتدیگیمدندیر
دل- زاریمده درد- عشق گوءن-گوءندن فزون اولماق
یئتن بی درد تدبیریله درمان ائتدیگیمدندیر
گؤزوم کیم باغریمین قانین تؤکر پرکاله-پرکاله
دمادم آرزو ی- لعل- جانان ائتدیگیمدندیر
دئگیل بیهوده گر یاغسا فلکدن باشیمه داشلار
بیناسین تیشهی - آهیمله ویران ائتدیگیمدندیر
قاچان روسوا اولوردوم، قان اودوب صبر ائده بیلسیدیم
ملامت چکدیگیم بیهوده افغان ائتدیگیمدندیر
خطا سندن دئگیل، جسمیم اوخوندان بی نصیب اولسا
حوباب- اشک- گوءلگون ایچره پنهان ائتدیگیمدندیر
فضولی، اختلاط- مردوم- عالمدن اکراهیم
پریوشلر خیالین مونس- جان ائتدیگیمدندیر
***
ائی کؤنول یاری ایسته جاندان کئچ
سر- کویین گؤزَت جهاندان کئچ
یا طمع کس حیات ذؤقیندن
یا لب- لعل- دلستاندان کئچ
موءلک- تجریددیر فراغت ائوی
ترک- مال ائیله، خانماندان کئچ
لامکان سئرینین عظیمتین ائت
بو خراب اولاجاق مکاندان کئچ
اعتبار ائتمه موءلک- دونیایه
اعتبار- علوّ- شاندان کئچ
اهل- دونیانین اولماز آخرتی
ائی فضولی، بو خاکداندان کئچ
* * *
گر دئییل بیر ماه مهریلن منیم تک زار صوءبح
باشین آچیب نیشه هر گوءن یاخاسین ییرتار صوءبح
گوءن دئییل، هر گوءن بیر آی مهریله کؤکسون چاک ائدیب
تازه-تازه داغلردیر کیم، قیلیر اظهار صوءبح
تیغ- خورشید ایله رفع اولسا یئریدیر کیم، مودام
یاندیریب پروانه یی، شمعه وئریر آزار صوءبح
صوءبحی شام و شامی صوءبح اولموش منم عالمده کیم
شام شمع- بزم اولوب، آیریلدی مندن یار صوءبح
گؤر نه عاشقدیر کی، بیر خورشید وصلین بولماغا
صرف ائدر هر لحظه مین-مین لؤلؤ- شهوار صوءبح
عشقده صادقلیک اظهار ائتدی داغین گؤستریب
غالبا دئرلردی کاذب، قیلدی اوندان عار صوءبح
هجر شامیندا غم ائتمیشدی فضولی، قصد- جان
اولماسایدی مرحمتدن دم ووروب غمخوار صوءبح
* * *
اگر موراد ایسه وئرمک صفای- جؤهر- روح
فلک مثال یوءروت ساغر- شراب- صبوح
بویورما تؤبه منه اول شرابدان ناصح
کی گؤرسه اونو توتار جزم ترک- تؤبه نصوح
هجوم- غمده منه اونو ائتدی ذؤرق- مئی
کیم، ائتمهدی اونو طوفان اولاندا کشتی- نوح
مودام چشمیمه قان دولدورور خدنگ- غمین
یووا باشیمدا توتان قوشلاری ائدیب مجروح
دل اولدو داغ- فراقینله شرحه- شرحه ولی
نه سود، چون سنه اولمادی حال- دل مشروح
تنیمده سانجیلی ناوکلرینله شادم کیم
در- بلا بو کلید ایلهدیر منه مفتوح
فضولی اولدو بئلین فکری ایله موی مثال
هنوز بولمادی اول سرّه احتمال- وضوح
* * *
قانسی ماهین، بیلمزم، مهریله اولموش زار صوءبح
هر گوءن ائیلر خلقه بیر داغ- نهان اظهار صوءبح
باتدی انجوءم، چیخدی گوءن، یا بیر اسیر- عشقدیر
تؤکدو دوءرّ- اشکی، چکدی آه- آتشبار صوءبح
نولا گر امواته احیا وئرسه صوءبحون دملری
ذکر- لعلیندیر کیم، ائیلر دم به دم تکرار صوءبح
بیر موصوّردیر کی، زرّین کِلک ایله هر گوءن چکر
صفحهی- گردونه نقش- عارض- دلدار صوءبح
موژده بیر خورشیددن وئرمیش مگر باد- سحر
کیم، نثار ائیلر اونا یوءز مین دوءر- شهوار صوءبح
عاشق- صادقدیر اظهار- غم ائیلر هر سحر
آه ایله خلقی یوخوسوندان قیلیر بیدار صوءبح
ائی فضولی، شام- غم انجامینا یوخدور اوءمید
بیر تسلّیدیر سنه اول سؤز کی، دئرلر وار صوءبح
* * *
اول مشک بو غزاله اخلاصیم ائیله واضح
«بلّغ صبا سلاماً مسکیّةالرّوایح[1]»
اولغاج حبیبه واصل، بیزدن هم اولما غافل
«لا تقطع الرّسایل، لا تکتم الصرایح[2]»
یوءزده سرشک قانی، سؤیلر غم- نهانی
«قد تظهر المعانی بالخطّ فی اللّوایح[3]»
من موبتلای- هجران، مندن ایراق جانان
«والعمر کیف ما کان مثل الرّیاح رایح[4]»
عشقین، فضولی- زار، ترک ائتمک اولدو دوشوار
«یا عارفاً بما سار، لا تُکسِرِ النّصایح[5]»
* * *
کیمسهده روخسارینا، طاقت- نظّاره یوخ
عاشقی اؤلدوردو شؤق، بیر نظره چاره یوخ
باغری بوءتونلر منه طعنه ائدرلر مودام
حالیمی شرح ائتمگه، بیر جگری پاره یوخ
ییغدی منیم باشیما دهر غمین نئیلهسین
بادیهی- عشقده من کیمی آواره یوخ
دهرده همتا سنه وار، یئری یوخ، گر دئسم
وار گؤزل چوخ ولی، سن کیمی خونخواره یوخ
گؤزده گزیب جیزگینیر قطرهی- اشکیم مودام
قطرهی- اشکیم کیمی چرخده سیّاره یوخ
چاک گؤروب کؤکسومو قیلما علاجیم، طبیب
ضایع اولور مرحمین، منده بیتر یاره یوخ
زارلیغیم عشقدن وار، فضولی ولی
اول مه- بی مهردن رحم من- زاره یوخ
* * *
نولا گر قوجسا میانین کمر- زر گوستاخ
گتیریب چوخلاری اورتایه زر، ائیلر گوستاخ
خاک- ساغر، جم و جمشیددیر، ائی پیر مغان
خبر ائت ساقیه کیم، توتمایا ساغر گوستاخ
رشک اودیله یاخیلیر رشتهی- جانیم کی، نئچون
دگر اول عارضه گیسوی- معنبر گوستاخ
روزنیندن قوما کیم، گون دوشه خلوتگهینه
حرم- شاهه نه لایق گیره چاکر گوستاخ
ساخلا، ای اشک، ادب، گئتمه سر- کویینه چوخ
کی، دوءشر اوءزدن و گؤزدن سوءرولر هر گوستاخ
هوسیم بادهی- گوءلگونه بو اومّید ائیله دیر
کیم، اولام مست توتام دامن- دلبر گوستاخ
بنزدیرسن اؤزونو ایتلرینه هر ساعت
ائی فضولی، اولا بیلمز سنه بنزر گوستاخ
* * *
رنگ- روییندن دم اورموش ساغر- صهبایه باخ
آفتاب ایله قیلیر دعوا، توتولموش آیه باخ
شمع باشیندان چیخارمیش دود شؤق- کاکلین
بؤیله کوتاه عؤمر ایله باشینداکی سئودایه باخ
ائی سلامت اهلی، اول روخساره باخما زینهار
احتراز ائیله ملامتدن، من- روسوایه باخ
بیلدی عشقیندن نمدپوش اولدوغون آیینه تک
رحم ائدیب بیر گز منه باخماز، بو استغنایه باخ
سینهمی چاک ائیله، گؤر دل اضطرابین عشقدن
رؤزن آچ هر دم هوادن مؤج اوران دریایه باخ
ائی دئین کیم، شام- اقبالین نه اوءزدن تیترهدیر؟
سایه سالمیش آیه اول گیسوی- عنبرسایه باخ
ائی فضولی، هر نئجه منع ائیلهسه ناصح سنی
باخما اونون قولینه، بیر صورت- زیبایه باخ
* * *
لبلرین تک لعل و لفظین تک دوءر- شهوار یوخ
لعل و گؤهر چوخ، لبین تک لعل- گؤهر بار یوخ
سندن ائتمن داد: «جؤرون وار، لوءطفون یوخ» دئییب
مست- ذؤق- شؤقونم، بیردیر یانیمدا وار، یوخ
کیمه اظهار ائیلهییم بیلمن بو پنهان دردی کیم
وار یوءز مین درد- پنهان، قودرت- اظهار یوخ
دؤر سرمست- شراب- غفلت ائتمیش عالمی
بونجا سرمستین تاماشاسینه بیر هوشیار یوخ
خلقی مدهوش ائیلهمیش خواب- شب- طول- امل
صوءبح تحقیقی علامتینه بیر بیدار یوخ
صورتی زیبا صنملر یوخ دئمهن بوءتخانهده
وار چوخ، امّا سنه بنزر بوءت- خونخوار یوخ
ائی فضولی، سهلدیر هر غم کی، غمخواری اولا
غم بودور کیم، منده مین غم وار، بیر غمخوار یوخ
* * *
گرمدیر شام و سحر مهرینله چرخ- لاجورد
گه سرشک- آل ائدر اظهار و گه روخسار- زرد
صوءبحه بنزر عاشق- صادق، دئمهن عالمده کیم،
بیر نفس کئچمز کی، چکمز سوز- دلدن آه- سرد
یاخشی سانما ائی کؤنول، اهل- خرد اطوارینی
اولما غافل، عشق دردیندن، یامان اولماز بو درد
موءمکون اولدوقجا فلک منسوبهسیندن قیل حذر
نیشه کیم، خالی دئگیل بیداد نقشیندن بو نرد
ظوءلمت- غم اضطرابین چکمز اول آزاده کیم
هر تعلّوقدن اولا خورشید تک عالمده فرد
ائی فضولی، کسمه اول مهوش وصالیندن اومید
صبر قیل کیم، دؤر دؤرانی دئگیل بیهوده گرد
[1] ترجومهسی: ائی سحر یئلی، مندن مشک قوخولو سلام یئتیر
[2] ترجومهسی: مکتوبلاری مندن کسمه، عذاب- اذیّتلرینی گیزلتمه
[3] ترجومهسی: معنالار لؤحهلر اوءزرینده خط ایله ظاهر اولور.
[4] ترجومهسی: عؤمور نه جور اولورسا- اولسون کوءلک کیمی اسیب گئدندیر.
[5] ترجومهسی: ائی اولان شئیلری بیلن، چوخ نصیحت ائتمه!
بحر- عشقه دوءشدون ائی دل، ذؤق- دونیانی اونوت
بالغ اولدون، گل رحِمدن ایچدیگین قانی اونوت
وئردی رحلتدن خبر موی- سفید و روی- زرد
چهرهی- گوءلگون ایله زوءلف- پریشانی اونوت
چک ندامتدن گؤگه دود- دلین، تک قانلی یاش
سرو- نازین ترک توت گوءلبرگ- خندانی اونوت
گؤر غنیمت فقر موءلکونده گدالیق شیوهسین
اعتبار- منصب و درگاه- سولطانی اونوت
چکمه عالم قئیدینی، ائی سربولند- فقر اولان
سلطنت تختینه ایردین، بند و زندانی اونوت
لؤح- خاطر صورت- جانانه قیل آیینه دار
اونو یاد ائت، هر نه کیم یادیندادیر، آنی اونوت
معصیت درسین یئتر تکرار قیل، دؤندر ورق
اؤزگه حرفین مشقین ائت، اول درس- عونوانی اونوت
ائی فضولی، چک ملامت رهگوذاریندان قدم
لحظه- لحظه چکدیگین بیهوده افغانی اونوت
* * *
مورده جسمیم الطفاتیندان بولور هر دم حیات
اؤلرم گر قیلماسان هر دم منه بیر الطفات
یازه بیلمز لبلرین وصفین تمام- عؤمرده
آب- حئیوان وئرسه خضره کِلک و ظولمتدن دوات
من فقیرم، سن غنی، وئرگیل زکات- حوءسن کیم
شرع ایچینده هم منه دیر، هم سنه واجب زکات
گؤرمه یینجه حوءسنونو ایمانه گلمز عاشقین
یوءز پیمبر جمع اولوب، گؤسترسه لر مین مؤعجزات
مظهر- آثار- قودرتدیر وجود- کاملین
فئیض- فطرتدن غرض سنسن طوفئیلین کاینات
جؤهر- ذاتینده دیر مجموع- اؤصاف- کمال
بو صفات ایله کی، سنسن، قاندادیر بیر پاک ذات؟
عشقه تا دوءشدوم فضولی، چکمه دیم دونیا غمین
بیل کی، قئید- عشق ایمیش دام- تعلّوقدن نجات
* * *
صبا اغیاردن پنهان غمیم دلداره اظهار ائت
خبرسیز یاریمی حال- خرابیمدن خبردار ائت
گتیر یادیم اونون یانیندا، ور گؤرسن کی، قهر ائیلر
خموش اولما، یئنه دوشنام تقریبیله تکرار ائت
کؤنول، غم گوءنلرین تنها کئچیرمه، ایسته بیر همدم
اجل خوابیندان، افغانلار چکیب، مجنونو بیدار ائت
چو یوخ، عشق آتشی بیر شؤعله چکسه، طاقتین، ائی نئی
باش آغریتما، دم- عشق اورما، آنجاق نالهی- زار ائت
منی رشک اودونا پروانه تک، ائی شمع، یاندیرما
یئتر خورشید- روخسارین چراغ- بزم- اغیار ائت
گرفتار- غم- عشق اولالی آزادهی- دهرم
غم- عشقه منی بوندان بتر، یارب، گرفتار ائت
فضولی، باخماق اولور اول گوءنش یادیله خورشیده
نه وجه ایله کیم، اولسا گوءن کئچر، فکر- شب- تار ائت
* * *
خط روخسارین ائدر لوءطفده رئیحان ایله بحث
حوءسن- صورتده جمالین گوءل- خندان ایله بحث
جنّتی کویینه زؤهد اهلی موناسب دئسهلر
نه موناسب کی، قیلام بیر نئچه نادان ایله بحث
یوءزونه دورماسین آیینه اوروب لاف- صفا
نه روا مه قیلا خورشید- درخشان ایله بحث
گرچی شومشادده چوخ لاف- لطافت واردیر
یورولور ائیلهسه اول سرو- خورامان ایله بحث
قیلسا جان لعلین ایلن فئیض یئتیرمک بحثین
جانب- لعلینی توت، ائی کؤنول، ائت جان ایله بحث
دوءشر اود شمع دیلینه بو سببدن کی، قیلیر
دیل اوزادیب گئجهلر اول مه- تابان ایله بحث
صفت- حوءسنون ائدر خسته فضولی، نه عجب
حوءسن- گؤفتارده گر ائیلهسه حسّان ایله بحث
* * *
جهان ایچره هر فتنه کیم، اولسا حادث
اونا سرو- قدّیندیر، البتّه باعث
مدارسده تحقیق- موی- میانین
دقایقدن اورتایه سالمیش مباحث
موحّدلره قیلما انکار، زاهد
مئی- وحدتی سانما اومّ- الخبایث[1]
ایکی دیدهسیز عالمه یوسف و سن
سیزه یوخ جهان ایچره امکان- ثالث
منه جمع اولور قاندا کیم، وار بیر غم
منم موءلک- غم ایچره مجنونه وارث
تؤکوب اشک کویینده، وصلین دیلر دل
ساچار نفع اوءچون دانه توپراغه حارث[2]
عوءذار و لبین وصفین ائیلر فضولی
اونا هم موفسّر دئرم، هم موحدّث
* * *
ائی غوبار- قدمین عرش- برین باشینه تاج
شرف- ذاتینه ادنای- مراتب معراج
مونتها شرعینه ادیان- تمامیّ- روءسول
بحرسن، شاعر- ارباب- رسالت امواج
خازن- گنج- شفاعت سنی قیلمیش ایزد
هیچ کیم یوخ کی، سنه اولمایا آخر مؤحتاج
سوءنّتین مغفرت اسبابینه منهاج- حصول
طاعتین معصیت امراضینه تدبیر- علاج
خلقه تقلید- سلوکین سبب- حوءسن- معاش
موءلکه تغییر- طریقین اثر- سوء- مزاج
قایم اولمازدی نظام و نسق- اصل- وجود
وئرمهسهیدین اثر- عدل الیه دونیایه رواج
شوءکر لله کی، فضولینی ائدیب داخل- فئیض
رغبتین دایرهی- خوفدن ائتمیش اخراج
* * *
جان چیخیر تندن کؤنول ذکر- لب- یار ائیلهگج
تن بولور جان یئنلَدَن اول لفظی تکرار ائیلهگج
قیلما ائی افغان، گؤزون بیدار، مست- خواب ایکن
اولمایا بیر فتنه پئیدا اولا، بیدار ائیلهگج
صؤحبتیمدن عار ائدیب، ائی گوءل، منی ترک ائتمه کیم
گوءل اولور افسورده ترک- صؤحبت- خار ائیلهگج
واریمی فکر- دهانینلا یوخ ائتدیم کیم، قضا
بؤیله امر ائتمیش مانا، یوخدان منی وار ائیلهگج
عرض- روخسار ائت بو گوءن، ائی مه، گوءم اولسون گؤیده گوءن
اؤیله کیم انجوم اولور، گوءن عرض- روخسار ائیلهگج
هر زبان بیر تیغدیر گویا زولئیخا قتلینه
یوسفی آلماقدا اهل- عشق بازار ائیلهگج
نالهی- زاریم، فضولی، خوش گلیر اول گوءلروخه
آچیلیر گوءل کؤنلو بوءلبول نالهی- زار ائیلهگج
* * *
کؤنلوم آچیلیر زوءلف- پریشانینی گؤرگج
نطقیم توتولور غونچه-ی خندانینی گؤرگج
باخدیقجا سنه قان ساچیلیر دیده لریمدن
باغریم دلینیر ناوک- موژگانینی گؤرگج
رعنالیق ایله قامت- شیمشادی قیلان یاد
اولمازمی خجل سرو- خورامانینی گؤرگج
چوخ عشقه هوس ائدنی گؤردوم کی هواسین
ترک ائتدی سنین عاشق- نالانینی گؤرگج
کافر کی دئییل مؤعترف- نار- جهنّم
ایمانه گلر آتش- هجرانینی گؤرگج
نازکلیک ایله غونچهی - خندانی ائدن یاد
ائتمزمی حیا لعل- دوءر افشانینی گؤرگج
سن حال-دلین سؤیله مهسن، نولا، فضولی؟
ائل فهم قیلیر چاک-گریبانینی گؤرگج
* * *
مونحرفدیر ساقیا اندوه- دونیادن مزاج
باده توت کیم، علّت- اندوهه غفلتدیر علاج
فقر موءلکون توت، گر استغناده ایسترسن کمال
سلطنتدن کئچ کیم، اول وادیده چوخدور احتیاج
چکمه تخت و تاج قئیدین، بی سر و پالیق گؤزَت
کیم، ایاغه بنددیر تخت و بلادیر باشه تاج
بیر پری زوءلفون توتوب، خالیندن آسلان کام- دل
توت کی، چین موءلکینی توتدون، هنددن آلدین خراج
ترک و تجرید اختیار ائت کیم، دیار- عشقده
فقر بازارینه اسباب- فنادندیر رواج
نقش- زایلدیر، امور- دهره قیلما اعتبار
اولسا حاصل فقردن حوءزن و غنادن ابتهاج
ائی فضولی، من ملامت موءلکونون سولطانییم
برق- آهیم تاج- زر، سیم- سرشکیم تخت و تاج
* * *
اولور قدّیم دوتا عشقین یولوندا، هر بلا گؤرگج
طریق اهلینه عادتدیر تواضؤع، آشنا گؤرگج
نهان عشقیمی معلوم ائتسه عالم، دود- آهیمدن
عجب یوخ کیم، گومان- گنج ائدر خلق، اژدها گؤرگج
فزون اولدوقجا عشقیم گرم اولور اشکیم گؤزوم ایچره
اگرچی سو برودت کسبینی ائیلر هوا گؤرگج
اوخون هر لحظه کیم، جانیم دلر، کؤنلوم قیلار افغان
به عئینی ائیله کیم، فریاد ائدر ایتلر، گدا گؤرگج
رواج- نقد نقش- سکّهدندیر، نولا غدر ائتسه
منه ائل، جسم- عوریانیمدا نقش- بی ریا گؤرگج
من- درویشه ائل هم جؤر ائدر، سن جؤر قیلدیقجا
کیم ائیلر ظوءلم منعین پادشاهیم، سن روا گؤرگج
فضولینی یاشور، ائی ضعف، مهوشلر جفاسیندان
کی، مهوشلر قیلیرلار مین جفا، بیر موبتلا گؤرگج
[1] پیسلیکلر آناسی
[2] اکینچی
کوهکن شیرینه اؤز نقشین چکیب وئرمیش فریب
گؤر نه جاهلدیر، یونار داشدان اؤزیچون، بیر رقیب
قاشلارین یایی بیر اوخ لوءطف ائیله میش هر عاشقه
من هم اوندان ائیلرم بیر اوخ تمنّا، یا نصیب
توتیای- خاک- پایین فئیضینه یول بولماسام
نور- چشمیم، عئیب قیلما، کور اولور دئرلر غریب
موضطربدیر چارهی- دردیمده، وه کیم، بیلمه ییب
بیر دواسیز درده اوغراتمیش اؤزون مسکین طبیب
برق- آهیمدن ائویم هر گوشه بولموش رخنه لر
گل گؤر، ائی گوءل کیم، گریفتار- قفسدیر عندلیب
ائی منه صبر ائت دئیَن حال- دلیمدن بی خبر
عشق اولان یئرده نه دیر آرام، یا نئیلر شکیب؟
ائی فضولی، اینجیمه سندن تغافول قیلسا یار
رسمدیر کیم، گؤستره احبابه استغنا حبیب
* * *
اول کی، هر ساعت گوءلردی چشم- گریانیم گؤروب
آغلار اولدو حالیما بی رحم جانانیم گؤروب
ائیلهین تعیین- اجزای- موداوا دردیمه
ترک ائدیب، جمع ائتمهدی حال- پریشانیم گؤروب
لاله روءخلر گؤکسومون چاکینه قیلمازلار نظر
هیچ بیر رحم ائیله مزلر داغ- پنهانیم گؤروب
توت گؤزون، ائی دود- دل، چرخین کی، دؤرین ترک ائدیب
قالماسین حئیرتده چشم- گؤهر افشانیم گؤروب
پرتؤ- خورشید سانمین یئرده، کیم دؤر- فلک
یئره اورموش آفتابین ماه- تابانیم گؤروب
سودا عکس- سرو سانمین، کیم، قوپاریب، باغبان
سویا سالمیش سروینی، سرو- خورامانیم گؤروب
ائی فضولی، بیل کی، اول گوءل عارضین گؤرموش دئگیل
اول کی، عئیب ائیلر منیم چاک گریبانیم گؤروب
* * *
روزگاریم بولدو دؤران- فلکدن انقلاب
قان ایچر اولدوم، ایاغین چکدی بزمیمدن شراب
شؤعلهی- آه ایله یاندیردیم دل- سرگشتهیی
بیر اود اولدوم جیزگینن چهرهمده اولمازمی کباب؟
لعلین ایله باده بحث ائتمیش، زهی گومراهلیق
اولدو واجب ائیلهمک اول بی ادبدن اجتناب
وئرمز اولدو یول وصاله پیچ- زوءلفون، آه، کیم،
رشتهی- تدبیردن دؤران- کجرو آچدی تاب
اولمادی اول ماهه رؤشن یاندیغیم هجران گوءنو
یاندیغین شب تا سحر شمعین نه بیلسین آفتاب
گؤز کی، پئیکانین قاپوب، گؤگدن ساچار هر یان سرشک
بیر صدفدیر، قطرهی- بارانی ائیلر دوءرّ- ناب
اولدو ابر- دود- آهیم پردهی- روخسار- ماه
آه کیم، آلماز جمالیندن هنوز اول مه نقاب
کسمهدی مندن سر- کویینده آزارین رقیب
ائی فضولی، جنّت ایچره نیشه یوخ، دئرلر عذاب؟
* * *
درد- عشقیم دفعینه زحمت چکر دایم طبیب
شوءکر کیم، اولموش اونا زحمت، منه راحت نصیب
بیر زباندیر شرح- غم تقریرینه هر برگ- گوءل
ائیلهمز بیهوده گوءل گؤردوکده افغان عندلیب
بیلسه ذؤقوم وصلدن فوءرقتده افزون اولدوغون
وصلدن منعیم روا گؤرمزدی رشکیندن رقیب
طعن- غفلتدیر پری طلعتلره اظهار- حال
سانما کیم، احباب حالیندان اولور غافل حبیب
آه، بیلمن نئیلهییم، قورتولماق اولماز قئیددن
من حریف- ساده دل، خوبان جمالی دلفریب
شمع قوءربیله تفاخور قیلما، ائی پروانه، کیم
خرمن- عؤمرون گؤیر برق- فنادان عنقریب
نولا آغلارسا فضولی رؤضهی- کویین آنیب
لاجرم گریان اولور قیلغاج وطن یادین غریب
* * *
پایبند اولدوم سر- زوءلف- پریشانین گؤروب
نطقدن دوءشدوم لب- لعل- دور افشانین گؤروب
اودا یاخدیم شمع وش جانیم، باخیب روخسارینا
چرخه چکدیم دود- دل سرو- خورامانین گؤروب
گزدیرر هر یان گؤزوم اشک اوءزره باغریم پاره سین
خلعت- گوءلگون ایله رخش اوءزره جؤلانین گؤروب
بیر زامان کئچمز کی، دل تیغیندن اولماز چاک-چاک
آچیلیر هر دم توتولموش کؤنلوم احسانین گؤروب
کؤنلومو تنهالیق ائیلردی پریشان سینهده
اولماسایدی جمع، هر یانیندا پئیکانین گؤروب
بند- زندان- غم و مؤحنتدن اولموشدوم خلاص
آه، کیم دوءشدوم یئنه، چاه- زنخدانین گؤروب
ائی فضولی، بونجا کیم توتدون نهان حال- دیلین
عاقبت فهم ائتدی ائل چاک- گریبانین گؤروب
* * *
غئیره ائیلر بی سبب مین التفات اول نوش لب
التفات ائتمز منه موطلق، نهدیر بیلمم سبب؟
جؤر اولور عادت غضب وقتی، نه عادتدیر بو کیم،
جؤرون آز ائیلر منه اول توءندخو قیلغاج غضب
نولا غمزهن فکری دوءشدیسه دل- سوزانیمه
ظالمین گر اولسا آتش منزلی، اولماز عجب
دم به دم گر دوءشسه گؤزدن دوءرّ- اشکیم وجهی وار
یاش اوشاقلاردیر یئتیم، اونلاردا یوخ رسم- ادب
جؤری کؤنلومدور چکن، گؤزدور گؤرن روخسارینی
آللاّه، آللاّه، کام آلان کیمدیر، چکن کیمدیر تعب
یار بیداد ائیلهمز عوشّاق فریاد ائتمهدن
هر نئجه روزی موقدّر اولسا، واجبدیر طلب
موطرب، آغلاتما سرودینله فضولی خستهنی
سئیل- اشکیندن ساقین، قوپمایا بونیاد- طرب
* * *
وصلین منه حیات وئریر، فرقتین ممات
«سبحان خالقی خلق الموت و الحیات[1]»
هجرانینا تحمّول ائدن وصلینی بولور
«طوبی لمن یساعده الصّبر و الثبات[2]»
مهریندیر اقتناع- مقاصد وسیلهسی
«ما شاء من اراد به الفوز و النّجاة[3]»
تؤکموش ریاض- طبعیمه باران- شؤقینی
«من انزل المیاه و احیا به النّباة[4]»
حق آفرینشه سبب ائتدی وجودینی
«اوجبت بالظهور ظهور المکوّنات[5]»
ایزد سریر- حوءسنه سنی قیلدی پادشاه
«اعلا کمال ذاتک فی احسن الصّفات[6]»
قیلدین ادای- نعت فضولی، تمام قیل
«کمّله بالسّلام و تمّمه بالصّلاة[7]»
* * *
یوءرو، یئتیر منه ائی سیم- اشک، بیداد ائت
گر آقچان ایله آلینمیش قول ایسَم آزاد ائت
ایتیرمه ایتلری آوازینین، کؤنول، ذؤقین
یئتر قارا گئجه لر هرزه- هرزه فریاد ائت
خراب اولان کؤنول، ائی بوءت، سنین مقامیندیر
تغافول ائیلهمه، بیر قاچ داش ایله آباد ائت
ائشیتمهدینمی، کؤنول، عشق موشکل اولدوغونو
سنه بو موشکل ایشی کیم دئدی کی، بونیاد ائت؟!
خلاف- عادته چوخ اولما، ائی پری، مایل
یئتر فسون ایله تسخیر- آدمیزاد ائت
صبا، اسیرلری قصدین ائیلهمیش اول گوءل
بیزی هم اوندا اگر دوءشسه فورصتین، یاد ائت!
فضولی، ایستر ایسن ازدیاد- روتبهی- فضل
دیار- روم گؤزَت، ترک- خاک- بغداد ائت!
* * *
عکس-روخسارین ایله اولدو موزیّن مرآت
بدن-مورده یه فئیض-نظرین وئردی حیات
بنزَدردیم قد-مؤزونینه فی الجومله اگر
جان ایچینده الف ائتسَیدی قبول-حرکات
خط بو مضمون ایله دیر طرف-زنخدانیندا
کی بو زندانین اسیرینه یوخ اومّید-نجات
کاکلین قیلدی موقرّر منه سرگشته لیگی
دئمه سین کیمسه کی وار گردیش-گردونه ثبات
غمزه پئیکانین ائدر عاشقه چشمین صدقه
اؤیله کیم مردوم-مؤمین وئره مؤحتاجه زکات
آفرین جؤوهر- مقبولینه کیم، عالمده
مومکون اولماز بو صفات ایله کی سنسن بیر ذات
ائی فضولی ورع و زؤهد ایله مؤعتاد اولدون
بیلمه دین حالینی بیهوده کئچیردین اؤقات
* * *
ائی اسیر- دام غم، بیر گوشهی- مئیخانه توت
توتما زؤهادین موخالف پندینی، پئیمانه توت
دیشلهدیمسه لعلین، ائی قانیم تؤکن، قهر ائیله مه
توت کی، قان ائتدیم، عدالت ائیله، قانی قانه توت
جیزگینیرکن باشینا شمع- روخوندن جانیمی
منع قیلما، آنی هم اول شمعه بیر پروانه توت
گر سنه افغانیمی بیهوده دئرسه مودّعی
اول سؤزه توتما قولاق، من چکدیگیم افغانه توت
توتمازام زنجیر- زولفون ترکین ائی ناصح، منی
خواه بیر عاقل خیال ائت، خواه بیر دیوانه توت
ائی اولوب سولطان، دئین دونیاده مندن غئیری یوخ
سن سنی بیر جوغد بیل، دونیانی بیر ویرانه توت
ائی فضولی، دهر زالینین فریبیندن ساقین
اولما غافل، ار کیمی ترپن، ایشین مردانه توت
[1] ترجومهسی: پاک و موقدّسدیر او یارادان کی، دیریلیگی و اؤلومو یاراتمیشدیر.
[2] ترجومهسی: او آدام خوشبختدیر کی، متانت و صبر اونا کؤمک ائدیر.
[3] ترجومهسی: نه ایسترسه کیمی نظرده توتارسا نجات و موفّقیّت اونون واسطه سیله دیر.
[4] ترجومهسی: یاغیش یاغدیریب، بیتکیلری دیریلدن
[5] ترجومهسی: ظهورونلا وارلیغین ظهورونا سبب اولدون
[6] ترجومهسی: ذاتینین کمالینی گؤزل صفتلرله یوءکسلتدی.
[7] ترجومهسی: سالام ایله اونو تامالا دوعا ایله بیتیر.
فقر موءلکی تخت و عالم ترکی افسردیر مانا
شوءکر لله، دؤلت- باقی مویسّردیر مانا
زوءلف- روخساری خیالیله نهدیر حالین دئمهن[1]
اؤیلهیم کیم، گئجه و گوءندوز برابردیر مانا
حور و طوبی وصفین، ائی واعظ بو گوءن آز ائیله کیم،
همدم اول طوبی قیام و حور پئیکردیر مانا
آرهدن، ائی شمع، چیخ بیر گوشه توت، کیم، بو گئجه
بزم بیر خورشید طلعتدن مونوّردیر مانا
وئردی باد- صوبح بیر خورشید طلعت موژدهسین
شمع وش وه، کیم، بو دم اؤلمک موقرّردیر مانا
زاهدا، سن قیل توجّؤه گوشهی- محرابه کیم
قبلهی- طاعت خم- ابروی- دلبردیر مانا
ائی فضولی، جمع اولور پئیوسته ائل نظّارهمه
عرصهی- دشت- جنون صحرای محشردیر مانا
* * *
شربت- لعلین کی، دئرلر چشمهی- حئیوان اونا
اول وئریر جان دم به دم عوشّاقه و من جان اونا
اوخلاریندان کیم، تیکن تک سانجیلیبدیر هر طرف
گوءلبونیدیر خم قدیم، هر غؤنچه بیر پئیکان اونا
خال و خطدیر بیلمن اول آیینهی- روخسار اوءزه
یا گؤزومدن عکس سالمیش مردوم و موژگان اونا
توتما، ائی قان، دم به دم طوغیان ائدیب تن چاکینی
قوی بو منظردن دمی نظّاره قیلسین جان اونا
بحره، لؤلؤ دیشلرین وصفین مگر، سؤیلهی صبا
کیم، قولاق توتموش صدف ایچره دوءر- غلطان اونا
سالدی خطّین ذؤقینی دل جانه، قانلار اوددوروب
طفل تک کیم، اوخودارلار زجر ایله قورآن اونا
ائی فضولی، اول صنم افغانینا رحم ائیلهمز
داشه بنزر باغری، تأثیر ائیلهمز افغان اونا
* * *
هر زامان منظور بیر شوخ- ستمگردیر مانا
قاندا اولسام بیر بلا حقدن موقدّردیر مانا
اول خم- ابرویه قیلسام سجده هر ساعت، نولا
قبله ایله اول خم- ابرو برابردیر مانا
غم دئگیل، جسمیمده گر سنگ- ملامت زخمی وار
شحنهی- بازار- سئودایم، بو زیوردیر مانا
گؤزده خون آلوده پئیکانین خیالیله خوشام
هر بیری، گویا کی، بیر برگ- گوءل- تردیر مانا
زخملردن مین آغیز اچدی ادای- شوءکره کیم
هر اوخون بیر نعمت- غئیر- موکرّردیر مانا
عقل ارشادیله بولماق کام موءمکوندور، ولی
دام- راه اول حلقهی- زوءلف- موعنبردیر مانا
اختر- بختیم وبالین گؤر کی، اول مهدن گلن
مهرلردیر اؤزگهیه، جؤر و جفالردیر مانا
ائی فضولی، منزل- مقصوده یئتسن، نه عجب
خدمت- پیر- موغان ارشادی رهبردیر مانا
* * *
منیم تک هیچ کیم زار و پریشان اولماسین یا رب!
اسیر- درد- عشق و داغ- هیجران اولماسین یا رب!
دمادم جؤورلردیر چکدیگیم بیرحم بوءتلردن
بو کافیرلر اسیری بیر موسلمان اولماسین یا رب!
گؤروب اندیشه-ی قتلیمده اول ماهی، بودور ویردیم
کی، بو اندیشه دن اول مه پشیمان اولماسین یا رب!
چیخارماق ائتسه لر تندن، چکیب پئیکانین اول سروین
چیخان اولسون دیل- مجروح، پئیکان اولماسین، یا رب!
جفا و جؤور ایله مؤعتادم اونلارسیز نولار حالیم
جفاسینه حد و جؤورونه پایان اولماسین یا رب!
فضولی بولدو گنج- عافیت مئیخانا کوءنجونده
موبارک موءلکدور، اول موءلک ویران اولماسین یا رب!
* * *
ائی ناوک- شؤقین سپر- سینهی- احباب
زوءلفون خمی ارباب- وفا صئیدینه قولاّب
محرابده شکل- خم- ابروی- لطیفین
واجب بو جهتدن قامویا سجدهی- محراب
سوزیم دئر ایدیم شمع سانا ائیلهیه رؤشن
نظّارهی- روخسارینا یوخ شمعده هم تاب
خورشید- جمالیندان اول آی سالدی نقابین
صوءبح اولدو، دور ائی بخت، نهدیر مونجا شکرخواب؟
دوءن صوءبح یئتیردیم فلکه مؤج- سرشکیم
غرق ائتدی فلک اوءزره اولان انجومو گرداب
ساقی مگر اول لعل سؤزون دئر مئی- نابه
کیم دوءشدو ایاغینه، الین اؤپدو مئی- ناب
جمعیّت- اسبابه کؤنول وئرمه، فضولی
کیم، تفرقهدیر خاطره جمعیّت- اسباب
* * *
صوءبح چکمیش چرخه، چالمیش داشه تیغین آفتاب
ظاهر ائتمیش اول مه- دلاّکه عئین- انتساب
دم به دم تحریک- تیغیندن بولور باشلار صفا
اؤیله کیم، سو مؤج اوروب ظاهر قیلیر هر دم حوباب
هر سر- مویینده بیر باش اولسا موی- سر کیمی
کسسه وارین، تیغ- خونریزیندن ائتمهن اجتناب
کشف- اسرار- ملامت جؤهر- تیغیندهدیر
کیم، آلیر باشلارداکی سئودا جمالیندان نقاب
غوصّهسیندن باشیمین قیل کیمی اینجَلمیش تنیم
کیم، تنیمله تیغی اورتاسیندا باشیمدیر حجاب
تیغ- چاپوک سئیرینه آهوی- چین دئرسم نولا
سئیر قیلدیقجا تؤکر صحرای- چینه مشک- ناب
موی- ژولیدهمله تیغیندن اومیدیم کسمزم
ائی فضولی، خالی اولماز برق- لامِعدن سحاب!
* * *
صوبح سالیب ماه روخوندن نقاب
چیخ کی، تماشایه چیخا آفتاب
رشتهی- جانیم یئتر ائت بیر گره
سالما سر- زوءلف- سمنسایه تاب
مست چیخیب، سالما نظر هر یانا
گؤرمه روا کیم، اولا عالم خراب
کسمه نظر جانب عوشّاقدن
نالهی- دلسوزدان ائت اجتناب
شاملر انجوم ساییرام صوءبحه دک
ائی شب- هجرین منه روز- حساب
دوزخه گیرمز ستمیندن یانان
قابل- جنّت دئگیل اهل- عذاب
سالدی آیاقدان غم- عالم منی
وئر منه غم دفعینه، ساقی شراب
رحم قیل اوفتادهلرین حالینه
هیچ گرکمزمی سنه بیر ثواب؟
یار سوال ائتسه کی، حالین نهدیر؟
خسته فضولی، نه وئررسن جواب؟
* * *
غالبا بیر اهل- دل توپراغیدیر دوءرد- شراب
کیم، قیلیب حؤرمت، بنالر دوتموش اوءستونده حوباب
برق و باران سانما کیم، گؤردوکجه آه و اشکیمی
بیلمزم نهمدیر منیم، آغلار منه، یانار سحاب
ائی سوران حالیم، بو استغنا سوالیندن نه سود؛
حالیم ائیلرسن سوال، امّا ائشیتمزسن جواب
دشت- غمده خاک- قبریم اوءزره سرو- گردباد
چکسه باش، اول سرودن سو کسمه، ائی سئیل- شراب
یئتمهییب وصلینه سن لئیلی وشین، بیر عؤمردور
من کیمی مجنون اولوب صحرایه دوءشموش آفتاب
اول بوءت ابروسین قویوب محرابه دؤندرمهن اوءزوم
قوی منی، زاهد، مانا چوخ وئرمه تانریچون عذاب
نقد- عؤمرون بیر صنم عشقینده صرف ائتدین تمام
ائی فضولی، آه، اگر سندن سورولسا بو حساب!
* * *
قیلسا وصلین شامیمی صوءبحه برابر، یوخ عجب
رسمدیر فصل- بهار اولماق برابر روز و شب
گوءن کی، سایهن دوءشدوگو یئردن دورار، بیر وجهی وار
گلسه عالیقدرلر، فقر اهلی دورماقدیر ادب
اولمادان مئیخانهی- عشقینده مست- جام- ذؤق
دوءزمهدی بزم- فلکده زؤهره قانون- طرب
جنّت- وصلیندیر اول مقصد کی، ایمان اهلینه
قیلسا حق روزی جهنّم آتشی اولدور سبب
غالبا مقصد وصالیندیر کی، دوءن گوءن دورماییب
چرخ سرگردان گزر، بیلمز نهدیر رنج و طرب
بستهی- زنجیر- زوءلفوندور نسیم- تر مزاج
تشنهی- جام- وصالیندیر موحیط- خوشک لب
قیلما فئیض- نعمت- وصلین فضولیدن دریغ
یوخدور اؤزگه مقصدی، سندن سنی ائیلر طلب
* * *
سن اوءزوندن عالمی رؤشن قیلیب سالدین نقاب
یازییا[2] سالسین بو گوءندن بؤیله نورین آفتاب
سن نه نور- پاکسن، ائی مظهر- صونع- الاه
کیم، آلیر شعم- روخوندن نور مهر و ماهتاب
عکس رویین سویا سالمیش سایه، زولفون توپراغا
عنبر ائتمیش توپراغین آدین، سویون اسمین گولاب
یئلده بولموش بوی- زولفون، سودا عکس- عارضین
کیم، یئلی باغرینا باسیب، سویا گؤز دیکمیش حوباب
لعلگون مئیدیر الینده ساغر- سیمین ایله
یا نگین- لعلدیر، رشک- لبیندن اولدو آب؟
کِلک- قودرت لؤح- سینهمده سنی قیلمیش رقم
ائیلهییب محبوبلر مجموعهسیندن انتخاب
ائی فضولی، هر عمل قیلسان خطادیر، غئیر- عشق
بودورور من بیلدیگیم، «والله اعلم بالصواب[3]»
[1] دئمهیین
[2] صحرایا
[3] ترجومهسی: دوغروسونو آللاّه داها یاخشی بیلر.
***
کمال- حوسن وئریبدیر شراب- ناب سانا
سانا حلالدیر، ائی موغبچه، شراب سانا
سنی ملک گؤرهلی یازماز اولدو عشقی گوناه
ولی یازیلدی بو اوءزدن بسی ثواب سانا
لبین سوالینا وئرمز جواب عوشّاقین
سوال اولورسا بو سندن، نهدیر جواب سانا؟
جزا گوءنونده سورولماز خطالر ائیلهدیگین
یئتر فغان ایله من وئردیگیم عذاب سانا
منی قراریم ایله قویماز اولدون، ائی گردون
یئریدیر آهیم ایله وئرسم انقلاب سانا
شوعاع- جؤهر- تیغیندن اومما رحم، ائی دل
ساقینما سو وئره، ائی تشنه، اول سراب سانا
فضولی، باشینا اول سرو سایه سالدی بو گوءن
علوّ- رفعت ایله یئتمز آفتاب سانا
* * *
رشتهدیر جسمیم کی، دؤر- چرخ وئرمیش تاب اونا
مردوم- چشمیم دوءزر هر دم دوءر- سیراب اونا
سایهی- زولفون شبستانیندادیر شمع- روخون
نئجه یئتسین قدر ایله خورشید- عالمتاب اونا؟
دوءرد- مئی تک غرقهی- خونابه گؤردوم کؤنلومو
گؤر نه گلدی باشینا نئتدی شراب- ناب اونا
قامت- خم بیرله بیر اهل- کرامتدیر قاشین
داش اولور، البتّه، گر باش اگمهسه محراب اونا
چشمینی اهل- نظر قصدینه تعیین ائیلهین
ناز و غمزهندن موحیّا ائیلهمیش اسباب اونا
ترلهمیش روخسار ایله خوبلار آچارلار کؤنلومو
گؤر نه گوءلشندیر کی، آتشدن وئررلر آب اونا
سلک- اهل- حاله چکمیش زاهدی اشک- ریا
مِس کیمی کیم، سیم قدرین بولدورور سیماب اونا
ائی فضولی، قالمامیش غؤغای- مجنوندان اثر
غالبا، افسانهی- عشقین گتیرمیش خواب اونا
* * *
عشق اطوارین موسلّم ائیلهدی گردون مانا
بونجا کیم، یئلدی- یوءگوردو، یئتمهدی مجنون مانا
قیلدی مندن رفع تکلیف- نمازی مستلیک
قالدی برحق نشئهی- جام- مئی- گوءلگون مانا
باغبان، گر مئیل قیلمان سروینه، معذور توت
سرودن یئیرک گلیر اول قامت- مؤزون مانا
دوستلار، قان- یاش تؤکوب قیلدی منی روسوای- خلق
وه کی، دوشمن چیخدی آخیر دیدهی- پورخون مانا
اولمازام، هر قاندا کیم اولسام، گرفتار اولمادان
بیر بلادیر گؤز، بیر آفتدیر دل- محزون مانا
ائی فضولی ناوک- آهیمله آلدیم انتقام
دؤنه- دؤنه گرچی بیداد ائتدی چرخ- دون مانا
* * *
غم دیاریندا اجل پئیکی گوذار ائتمز مانا
یوخ سانیب واریم مگر کیم، اعتبار ائتمز مانا
یار جؤر ائتمز مانا، اغیار تعلیم ائتمهدن
بالله، اغیار ائیلهین احسانی یار ائتمز مانا
داغیدیر هر لحظه رخت- عئیشیمی آهیم یئلی
قانسی ناحق ظوءلمدور کیم، روزگار ائتمز مانا
عشق ذؤقیله خوشام، ترک- نصیحت قیل، رفیق
من کی، تریاکی مزاجم، زهر کار ائتمز مانا
چرخدن آشورمادان یادینله آه- آتشین
غدر ائدیب گردون شرردن زر نثار ائتمز مانا
نقد- جان تاراج- غمدن ساخلاماق دوءشواردیر
عشق تا سنگ- ملامتدن حصار ائتمز مانا
یاد- لعلینله فضولی گؤزلهییب راه- عدم
وار بیر تدبیری، امّا آشکار ائتمز مانا
* * *
جانیمین جؤهری اول لعل- گوءهرباره فدا
عؤمرومون حاصلی اول شیوهی- رفتاره فدا
درد چکمیش باشیم اول خال- سیَه قوربانی
تاب گؤرموش تنیم اول طورّهی- طرّاره فدا
گؤزلریمدن ساچیلان قطرهی- اشکیم گوءهری
لبلریندن تؤکولن لؤلؤی- شهواره فدا
چاک سینهمده اولان قانلی جگر پارهلری
مست چشمینده اولان غمزهی- خونخواره فدا
پاره- پاره دل- مجروح- پریشانیمدان
سر- کویینده اولان هر ایته بیر پاره فدا
جان و دل قئیدینی چکمکدن اؤزوم قورتاردیم
جانی جانانهیه ائتدیم، دلی دلداره فدا
ائی فضولی، نولا گر ساخلار ایسم جانی عزیز
وقت اولا کیم، اولا اول شوخ- ستمکاره فدا
* * *
غمدن اؤلدوم، دئمهدیم حال- دل- زار سانا
ائی گوءل- تازه، روا گؤرمهدیم آزار سانا
ایچ مئی- ناب کی، باغریمدان ائدر جومله کباب
آتش- عشق ایله عوشّاق- جگرخوار سانا
مئی- گوءلگونده دئگیل نرگس- مستین عکسی
قدح اولموش، گؤز آچیب، عاشق- دیدار سانا
عارضین گوءل- گوءل ائدیبدیر مئی- گوءلگون تابی
وه کی، بیر گوءلدن آچیلمیش نئچه گوءلزار سانا
باغه سئیر ائت بو روءخ- لعل ایله کیم، غؤنچه و گوءل
گؤستره خون- دل و دیدهی- خونبار سانا
دئر ایدیم قامتینه سرو، ولی اؤزگه ایمیش
حرکات و روش و شیوه و رفتار سانا
اگیلیب طرف- بناگوشینه، درد- دلیمی
یا او تاغین دئیه، یا طورّهی- دستار سانا
من گرفتارینم و فتنهدن اولمان آزاد
هیچ کیم اولماسین، ائی شوخ، گرفتار سانا
لعل- نابین هوسی باغریمی قان ائیلهدیگین
آه کیم، قانلی یاشیم قیلمادی اظهار سانا
ائی فضولی، فلکین وار سنینله نظری
کیم، غم و محنتینی وئردی نه کیم وار سانا
* * *
غمزهسین سئودین، کؤنول، جانین گرَکمزمی سانا؟
تیغه اوردون، جسم- عوریانین گرکمزمی سانا؟
آتشین آهیمله ائیلرسن منه تکلیف- باغ
باغبان، گوءلبرگ- خندانین گرکمزمی سانا؟
یئله وئرمه داغیدیب هر یان، آیاقلاردان گؤتور
ائی پری، زوءلف- پریشانین، گرکمزمی سانا
ائی کمان ابرو، رقیبه وئرمه غمزهندن نصیب
اوخ آتارسان داشه، پئیکانین گرکمزمی سانا؟
یاندیریب جانیم جاهانسوز ائتمه برق- آهیمی
آسمان، خورشید- رخشانین گرکمزمی سانا؟
کوءفر- زولفوندن منی منع ائیلهمک لایقمیدیر
صوفی، انصاف ایله ایمانین گرکمزمی سانا؟
توتالیم کیم، اشک سئیلابینه یوخدور اعتبار
ائی فضولی، چشم- گریانین گرکمزمی سانا؟
* * *
گرچی، ائی دل، یار اوءچون اوءز وئردی یوءز محنت سانا
ذرّهجه قطع- محبّت ائتمهدین، رحمت سانا
ساخلاما نقد- غمی عشقینی ائی جان ظاهر ائت
کیم، وئریم حبس- بدندن چیخماغا روخصت سانا
چارهی- بهبودیمی سوردوم موعالجدن، دئدی:
درد، درد- عشقدیر، مومکون دئگیل صحّت سانا
توتارام یارین قیامتده، حبیبیم دامنین
مستسن غفلت شرابیندان، بو گوءن مؤهلت سانا
عشق اهلین آتش- هجرانه ائیلرسن کباب
دؤنه- دؤنه امتحان ائتدیم، بودور عادت سانا
اینجیدیر نالهم سنی، وه نولا گر بیر تیغ ایله
چشم- جلاّدین ائده احسان منه، منّت سانا
سنده دوءن گؤردوم، فضولی، مئیل- محراب و نماز
ترک- عشق ائتمکمی ایسترسن، نهدیر نیّت سانا؟
* * *
ائی بی وفا کی عادت اولوبدور جفا سانا
بالله جفادیر، اولما، دئمک بیوفا سانا
گه ناز و گه کیریشمه و گه عشوهدیر ایشین
جانین سئونلر اولماسا یئی آشنا سانا
مین جان اولایدی کاش من- دلشکستهده
تا هر بیریله بیر گز اولایدیم فدا سانا
عشقینده موبتلالیغیمی عئیب ائدن سانیر
کیم، اولماق اختیار ایلهدیر موبتلا سانا
ائی دل کی، هجره دو˚یماییب (1) ایسترسن اول مهی
شوءکر ائت بو حاله یوخسا گلر بیر بلا سانا
ائی گوءل، غمینده اشک روخ- زردیم ائتدی آل
بیلدیردی اولا صورت- حالیم صبا سانا
دوءشمز چو شاه قوءربی فضولی گدالره
اول شاهدن التفات نه نسبت مانا، سانا
* * *
شب کی، مفتاح- مه- نؤ اولا گنجینه گوشا
قیلا پئیمانهی- گردونی جواهرپئیما
گیزلهییب چشمهی- خورشید سویون کوزهی- چرخ
قطره- قطره قیلا انجوم رشحاتین (2) پئیدا
لالهرنگ اولا شفقدن فلک- مینا فام
دیشره سالمیش کیمی عکس- مئی- گوءلگون مینا
مه- نؤ جامینی دؤره گتیره ساقی- دهر
انجوم- چرخه سالا نشئهی- تأثیر- هوا
من هم اول روحفزا راهی (3) تؤکم ساغره کیم
نخل- همّت رشحاتیندان آلا نشو و نوما
توتار اولسام، نه عجب، مئی اتگین دوءرد صفت
ائیلهییبدیر نئجه توپراغی بو اکسیر طلا
جام دؤرینده، فضولی، اوخودوم مئی وصفین
آتش- خرمن- غم، آب- حیات- حوکما
(1)دؤزمهییب
(۲) دامجیلار
(۳)شرابی
* * *
یا من احاط علمک الاشیاء کلّها (۲)
نه ابتدا سنه متصوّر، نه انتها
کیم وئرسه جان یولوندا، بولور خاک- مقدمین
گویا کی، خاک- راهینهدیر نقد- جان بها
سنسن قیلان مظاهر- اومّید و بیم ائدیب
موسایی علم گنجی، عصاسینی اژدها
سندن بولوبدور احم- مرسل مقام- قوءرب
تحسین- «یا» و «سین» ایله تشریف- «طا» و «ها»
یعقوبده نشانهی- شؤقین غم و الم
یوسفده نشئهی- نظرین بهجت و بها
بولمازدی، قهرین آچماسا خان- سیاستین
«هل من مزید(۳)» لؤقمهسینه دوزخ اشتها
یا رب، بلای- قئیده فضولی اسیردیر
اول بی دلی بو دام- کدورتدن ائت رها
* * *
یا رب، همیشه لوءطفونو ائت رهنما مانا
گؤسترمه اول طریقی کی، گئتمز سانا، مانا
قطع ائیله آشنالیغیم اوندان کی، غئیردیر
آنجاق اؤز آشنالرین ائت آشنا مانا
بیر یولدا ثابت ائت قدم- اعتباریمی
کیم، رهبر- شریعت اولا موقتدا مانا
یوخ منده بیر عمل سنه شایسته، آه اگر
اعمالیمه گؤره وئره عدلین جزا مانا
خؤف- خطاده موضطربم، وار اومید کیم
لوطفون وئره بشارت- عفو و عطا مانا
من بیلمزم منه گرَگین، سن حکیمسن
منع ائیله، وئرمه، هر نه گرَکمز سانا، مانا
اولدور منه موراد کی، اولدور سنه موراد
حاشا کی، سندن اؤزگه اولا مودّعا مانا
حبس- هواده قویما فضولی صفت اسیر
یا رب، هدایت ائیله طریق- فنا مانا
* * *
زهی، ذاتین نهان و اول نهاندان ماسوا پئیدا
بحار- صونعونه امواج پئیدا، قعر ناپئیدا
بولند و پست- عالم شاهد- فئیض- وجودوندور
دئگیل بیهوده اولماق یوخ ایکن عرض و سما پئیدا
کمال- قودرتین اظهار- حکمت قیلماغا ائتمیش
غوبار- تیرهدن آیینهی- گیتینوما پئیدا
دمادم عکس آلیر مرآت- عالم قهر و لوءطفوندن
اونونچون گه کدورت ظاهر ائیلر، گه صفا پئیدا
گهی توپراغه ائیلر حکمتین مین مهلقا پنهان
گهی صونعون قیلیر توپراقدن مین مهلقا پئیدا
جاهان اهلینه اسرار- علمین قالمایا مخفی
قیلیبدیر حکمتین کوفّار ایچینده انبیا پئیدا
نشان- شفقتیندیر کیم، اولور اظهار- حمدینچون
فضولی تیره طبعیندن کلام- جانفزا پئیدا
* * *
اشرقت من فلک البهجتِ شمسٌ و بِها
ملأ العالمَ نوراً و سروراً و بها (۴)
چیخدی بیر گوءن کی، ضیاسیندا تمامیّ رُسُل
اولدو محو اؤیله کی، خورشید شوعاعینده سها
اولدو بازار- جاهان رؤنقی بیر دورّ- یئتیم
کی، دئگیل ایکی جاهان حاصلی اول دورّه بها
روتبهی- حکمت- معراج- کمالینه گؤره
حوکَما فرقهی- دون، فلسفه جمع- سوفَها
مونهی- معرفتی حال دیلیله دایم
قیلیر اهل- حقه اسرار- حقیقت انها
نئجه تقریر ائدهیین وصفینی بیر شاهین کیم
اونا وصّاف اولا «یاسین» و موعرِّف «طاها»
ائی فضولی، ره- شرعینی توت اول راهبرین
بو طریق ایله ضلالتدن اؤزون ائیله رها
* * *
ائی اولوب معراج بورهان- علوّ- شان سانا
یئره ائنمیش گؤیدن استقبال ائدیب فورقان سانا
حئین- دعوای- نبوّت مودّعی الزامینه
جاهل ایکن ائل، کمال- علم بس بورهان سانا
کِلک- حؤکمون چکدی حرف- شاعر- ادیانه خط
حؤکم اثبات ائتدی نفی- شاعر- ادیان سانا
باقی- مؤعجز نه حاجت امر- حق اثباتینه
عالم ایچره مؤعجز- باقی یئتر قورآن سانا
وصف جبریل- امین ائتمیش قبول- خدمتین
سرّ- حق کفینه آیتله یئتیب فرمان سانا
سنسن اول خاتم کی، دفع ائتمیش تمام- حاکمی
خاتم- حؤکم- رسالت تاپشیریب دؤران سانا
اول قدر ذؤق- شفاعت جؤهر- ذاتیندادیر
کیم، گلیر عرض- خطا معنیده بیر احسان سانا
ماه- نؤدور، یوخسا سن ائتدیکده سئیر- آسمان
قالدیریب بارماق گتیرمیش آسمان ایمان سانا
یا نبی، لوطفون فضولیدن کم ائتمه اول زامان
کیم، اولور تسلیم مفتاح- در- غوفران سانا
* * *
کارگر دوءشمز خدنگ- طعنهی- دوشمن مانا
کثرت- پئیکانین ائتمیشدیر دمیردن تن مانا
ایمنم سنگ- ملامتدن کیم، آلیب چهرهمی
اولدو زنجیر- جنون بیر قلعهی- آهن مانا
اوندانام روسوا کیف سئیلاب- سرشکیم چاک ائدر
زخم- تیغین قانی گئیدیردیکجه پیراهن مانا
دم به دم شمع- جمالیندان مونوّر اولماسا
ائی گؤزوم نوری، گرَکمز دیدهی- رؤشن مانا
هیچ مسکنده قراریم یوخدورور اول ذؤقدن
کیم، قاچان خاک- سر- کویین اولا مسکن مانا
باشدا بیر سرو- صنوبر وصلینین سئوداسی وار
سود قیلماز باغبان، نظّارهی- گولشن مانا
ائی فضولی، اودلارا یانسین بساط- سلطنت
یئیدیر اوندان، حق بیلیر، بیر گوشهی- گولخن مانا
* * *
ائی ملک سیما کی، سندن اؤزگه حئیراندیر سانا
حق بیلیر، انسان دئمز هر کیم کی، انساندیر سانا
وئرمهین جانین سنه، بیلمز حیات- جاودان
زندهی- جاوید اونا دئرلر کی، قورباندیر سانا
عالمی پروانهی- شمع- جمالین قیلدی عشق
جان- عالمسن، فدا هر لحظه مین جاندیر سانا
عاشقه شؤقونله جان وئرمک ایکن موشکول دئگیل
چون مسیح- وقتسن، جان وئرمک آساندیر سانا
چیخما یاریم گئجهلر، اغیار طعنیندن ساقین
سن مه- اؤج- ملاحتسن بو نؤقصاندیر سانا
پادشاهیم، ظوءلم ائدیب عاشق سانا ظالم دئمیش
خوبرولاردان یامان گلمز، بو بؤهتاندیر سانا
ائی فضولی، خوبرولاردان تغافولدور یامان
گر جفا هم گلسه اونلاردان، بیر احساندیر سانا
* * *
جام ایچره مئی کی، دایره سالمیش حوباب اونا
آیینهدیر کی، عکس سالیر آفتاب اونا
زاهد سوال ائدرسه کی، مئیدن نهدیر موراد؟
بیزده صفادیر، اوندا کدورت، - جواب اونا
قان- یاش تؤکوب یانیندا دؤنر آتشین کباب
معشوقه بنزر آتش و عاشق کباب اونا
ائیلر کؤنولده اشک خطین شؤقونو فزون
اوددان چیخار بوخار، ساچیلدیقجا آب اونا
چشمین مریضی اولدو کؤنول، لعلینی یئتیر
رنج- خوماره دوءشدو، دوادیر شراب اونا
تکلیف- جنّت ائیلهمه کویینده کؤنلومه
چون جنّت اهلیدیر، نه وئریرسن عذاب اونا؟
مسدوددور فضولیه مئیخانهلر یولو
یا رب، هدایت ائیله طریق- صواب اونا
* * *
دوستوم، عالم سنینچین گر اولور دوشمن مانا
غم دئگیل، زیرا یئترسن دوست آنجاق سن مانا
عشقه سالدیم من منی، پند آلماییب بیر دوستدن
هیچ دوشمن ائیلهمز اونو کی ائتدیم من مانا
جان و تن اولدوقجا، مندن درد و داغ اکسیک دئگیل
چیخسا جان، خاک اولسا تن، نه جان گرک، نه تن مانا
وصل قدرین بیلمهدیم هجران بلاسین چکمهدن
ظولمت- هجر ائتدی چوخ موبهم ایشی رؤشن مانا
دود و اخگردیر مانا سرو ایله گوءل، ائی باغبان
نئیلرم من گوءلشنی، گوءلشن سانا، گوءلخن مانا
غمزه تیغین چکدی اول مه، اولما غافل، ائی کؤنول
کیم، موقرّردیر بو گوءن اؤلمک سانا، شیون مانا
ائی فضولی، چیخدی جان، چیخمان طریق- عشقدن
رهگوذار- اهل- عشق اوءزره قیلین مدفن مانا
قایناق: دده قورقود کتابخاناسی