سنله یاشاییرام، سنینله وارام

حیات پیکریمه، گوز آنا دیلیم

سنسن اسکی گونوم، گله جه ییمده

یابانجی سوزلره، دوز آنا دیلیم

حیات اینجه لیین، گول بوداغیندا

شیرین نغمه لری، یار دوداغیندا

شعیر چیچکلرین، موغام باغیندا

سویله سن سئویملی سوز آنا دیلیم

یالتاقلیق قوخوسو، سنه چاتماسین

قارشی چیخ یاساغا، حاققین باتماسین

ائله آرخالان کی، سنی آتماسین

صنعت دریاسیندا، اوز آنا دیلیم

سمادان گئنیش سن،  دنیزدن درین

گاهدان آتش کیمی، گاهدان دا سرین

یوکسه لیر سنینله ایگیدین، ارین

بیر گون قور ائده جک کوز، آنادیلیم

کور اولسون خور باخان گوزلری سنه

دوشمه سین وارلیغین دومانا- چنه

سئوگیلیم بیرلیکده دئیه ک وطنه

یاشاسین ائل اوبام، اوز آنا دیلیم

سویله دردیمیزی، تاپ درمانیندا

گووه نک قوی سنه، ائللر یانیندا

قورقود دده میزین دئنن شانیندا

آشیقلار سازیندا، سوز آنادیلیم

عصیرلردن باشدا بیزه ساری باخ

دوستلاری سئویندیر، دوشمنلری یاخ

آفاقا یاییلیب زنگین لییین باخ

اینجی لر مصراعدا، دوز آنا دیلیم

فریبا ابراهیمی (آفاق) 

قایناق http://xanturkoglu.blogfa.com/