_هوشنگ جعفری
_زنجان؛ قیزیل ازربایجان
یارین بویون قوجاقلادیم، یار آغلادی من آغلادیم
ییغیشدی قونشولار بوتون جار آغلادی من آغلادیم
باشیندا قار قالان داغا، دانیشدیم آیرِیلیق سؤزون
بیر آه چکیب باشینداکی قار آغلادی من آغلادیم
طارمدا نار آغاجلاری منی گؤروب دانیشدیلار
بویومو زیتون اوخشادی نار آغلادی من آغلادیم
یؤرک سؤزون دئدیم تارا ,سیملر اولدو پارا- پارا
یواش- یواش سیزیلدادی , تار آغلادی من آغلادیم
دیئدیم کی حاق منیم کیدیر باشیمی جکدیلر دارا
طناب کسنده بوینومو دار آغلادی من آغلادیم
ایلیگه اسدی بیر خزان تالاندی گوللریم منیم
خبر چاتینجا بولبوله خار آغلادی من آغلادیم
«جعفریم» بویوم بالا غم سینمده قاقا- قالا
یار جانیمی آلا آلا یار آغلادی من آغلادیم.