سووالام ...
دانیشمادیم ؛ ائله بیلدین کی لالام
بیلمه دین باشدان ایاغا سووالام
سنین کویونده قانادسیز گویرچین
یوخسا بیل باشقا یئرلرده قارتالام
شوشه سانیب داش گوتوروب سیندیردین
دای بوینوندان آسلاناجاق وابالام
کویووه گلن لرین ان ایلکی یم
چیخارتسان ؛ چیخاندا هامیدان دالام
گرگ بخارا - سمرقند وئریله
هیندین اولماسامدا ؛ منده بیر خالام
قوربانین - حئیرانین - شئیدان - اسیرین
سن بیرده نه ؛ من باخ چاهار ماحالام
کیپریک لرینه دئ کی آز اوخ آتسین
من صمد ام ؛ نه رستم ام - نه زالام
صمد پور امان بیله سوار
بیز نییه سئومه یک بیر- بیریمیزی؟!
یئر گؤیو، داغ داغی، داش داشی سئودی
قاش، گؤزه وورولدو، گؤز، قاشی سئودی
تانری ناخیش ووردو نقاشی سئودی
بیز نییه سئومه یک بیر- بیریمیزی؟!
چمن لر تورپاغا خالی چکیر سه
خالیدا یاشیلی، آلی چکیر سه
آری چیچک لردن بالی چکیر سه
بیز نییه سئومه یک بیر- بیریمیزی؟!
عؤمور گؤز قیرپیمی، فرصت آزدی سا
اوچوب الیمیزدن گئدن یازدی سا
کؤنول سون نفسده سینان سازدی سا
بیز نییه سئومه یک بیر- بیریمیزی؟!
اولدوزلار سایریشیب گؤز وورور آیا
چشمه لر چاغلاییب تؤکولور چایا
سئون لر گلیر سه هر گون دونیایا
بیز نییه سئومه یک بیر- بیریمیزی؟!
گول شئهدن گوج آلیر، مامیر قایادان
کؤز اوددان قیزاریر، چیچک حیادان
سوزولوب گلیرسه کؤکدن مایادان
بیز نییه سئومه یک بیر- بیریمیزی؟!
عؤمرون هم سئوینجی هم آهی وار سا
پروانه یانغیسی شام آهی وار سا
آدمین جنتده تاماهی وار سا
بیز نییه سئومه یک بیر- بیریمیزی؟!
یاغیش چیچک لرین اؤپور اوزونو
داملا پیچیلتییلا دئییر سؤزونو
شلاله قایادان آتیر اؤزونو
توفان داغی سئویر، دالغا دنیزی
بیز نییه سئومه یک بیر- بیریمیزی؟!
بیز نییه سئومه یک بیر- بیریمیزی؟!
زلیم خان یعقوب