پاییز گلینی...
سطیر-سطیر دویغولاریندان، دوغولورشعریم؛
و واراقلارا هوپموش ایستی نفسیندن .
اللرین…
عطیرلی سطیرلرین معماری ،
و قیفیللانمیش کئفیمیزین آچاری.
گؤزلرین...
شهرین بوینو بوکولموش چیراغلاری!
یاناغین...
اوچ آلمالیق باغچا -
اوپوشدور دوداغیندا حرفلری
دوغولسونکلمهلر !
بوی آتسین کورپه ایناملار
پوئیزیامیزین پاییز گلینی
شعرین -
گوزو باسیلمیش نغمه لرین نفسی ،
و قارا-قانچیل دیلکلرین سیزیلتیسی.
اوخشا شعرینی...
آغلا شعرینی ...،
دیلیم،دیلیم دوغرا شعرینی ...!
گویه رسین توپراقدان دیلیم،دیلیم "دیلیم"
رسول آرانلی
فضولی
منی ذکر ائتمز ائل، افسانهی- مجنونا مایلدیر
نه بنزر اول منه، دردی اونون درمانه قابلدیر
بیابانلاردا مجنوندان غم و دردیم سوال ائتمین
نه بیلسین بحر حالین اول کی، منزلگاهی ساحلدیر
منیم تک اولا بیلمز شؤهرهی- شهر- بلا مجنون
قبول ائیلرمی بو روسوالیغی هر کیم کی، عاقلدیر
نه موشکل حالی اولسا عاشقین معشوق ائدر چاره
گر اول بیدرد بیلمزسه بو حالی، حال موشکلدیر
فراق ایّامی سئیلاب- سرشکیمدن خبر توتماز
قیامت ماجراسیندان گؤر، اول ظالم نه غافلدیر
فقیه- مدرسه معذوردور انکار- عشق ائتسه
یوخ اؤزگه علمینه انکاریمیز، بو علمه جاهلدیر
فضولی، ائل سنی مجنوندان افزون دئر ملامتده
بونا مونکر دئگیل، مجنون دخی معقوله قایلدیر
باشین ساغ اولسون آذربایجان...
عاشیق شئعرینین تانری سی "زلیم خان یعقوب" دونیاسین دئییشدی...
شاعیر تانیتیمی رسول آرانلی
رسول آرانلی
شاعیر و ژورنالیست
1345 اینجی ایلده موغانین پارس آباد شعرینده آنادان اولوب.
""""""""""""""""""""""""""""
اوشاق ایکن آنام منه منظوم ناغیل و شعرلری سویله ییب.
اوچاغدان شعر و ادبیاتا ا ماراغلانمیشام. (آرانلی)
گوشی
یئر توتوب دیر اول قدر حوسن و ملاحت گوشی ده
بونجادیر داییم اولور بد باخت جماعت گوشی ده
عاشیقه لازیم دئییل چرشنبه لر چشمه باشی
چونکی واردیر هر زامان سئوگی محببت گوشی ده
بیر بولاق دیر هر گروه آلمیش گوزللر دوره سین
سیفعلی فیش وئرمه یه تاپدی جسارت گوشی ده
ایندی دوستلوقلار خیاوانذان چکیلمیش پی وی یه
ایله شیب سئودالی لار ائوده قیلیر چت گوشی ده
شکلینی گوندر عیان کیمدیر قارانلیقدا گوره؟
باخ نمایان دیر تامام هر سرو قامت گوشی ده
بوردا نه قونشو تانیش واردیر نه مامور گیر وئره
یوخدو بیر کس عاشیقی قیلسین ملامت گوشی ده
گورمه یه هر انسانی سیز باشقا یئر آختارمایین
چون تاپارسیز هر کیمی اولدوقجا راحت گوشی ده
یاشلی یاشسیز تلگرامدا گونده جولان ائیلییر
ماندانا سکینه خالا سامان حاج عززت گوشی ده
هاردادیر طعن ائیلیین لر حوکمتی ایشسیز لیگه
گور نئجه شاغیل قیلیب دیر خالقیدولت گوشی ده
باش قاتیب دیر جومله عالم بیر بئکار یوخ قارداشیم
وار بیری ایشسیز لیگه ائتسین شکایت گوشی ده؟
باتمامیش گون کئچدی بیرده صوبح نامازیندا چیخار
چون موسلمان دیر ائدیر هر آن عبادت گوشی ده
لیس الالانسان الا ما سعی دن درس آلیب
مکتب قرآنه خاطیردیر بو عادت گوشی ده
ایندی دوران باشقادیر چون تسبیحه یوخ احتیاج
ذکر ائدیر شوقیله هردم جومله میللت گوشی ده
هر کیمین گر ائوده واردیر بیر هئجر غیرتدی سی
بعضا او الدن آلیر چوخ وار شماتت گوشی ده