شعر اوجاغی

شاعیرلریمیزین بیوگرافی و شعرلری

زامان پاشازاده (دوغوم )

0 گؤروش
یازار:‌ شعر اوجاغی

   زامان پاشازاده 

         

 

    دوغوم

 

       

اؤکسوز شئعیرلریمین کفیل قایغی چکن لری!

سورارسانیزسا سؤزجوکلردن

آرارسانیزسا دیدرگین تینیمی آرالاریندان

اونوتمایین

           آغری

                 آغری دئمکدیر؛

                 بارماق قویدوغونوز یئریمده

                 یوخسا بارماغینیزین اؤزونده اولسادا

                هر بیر اولایدان یارانسادا

                 اولای یاراتسادا هردن.

دوغوم گونونوز قوتلو، شئعیرلریمین یئنی دوغولان آتالاری!

«اؤلوم له اولومون باش حرفینده» آغلایان

یاغیش لا یاغمورون سون هئجه سین ده ایسلانان

                                                     وارسا

                                                         سیزسینیز

                                                             یوخسا

                                                               منم (؟)

اؤکسوز شئعیرلریمین اؤکسوز سؤزجوکلری!

 یوزولورسونوزسا     سئویلدییینیز کیمی

چؤزولورسونوزسه     سویولدوغونوز کیمی

پوزولورسونوزسا       سؤیولدویونوز کیمی

هله کفن چوروتمه میش بیر اؤلو وار سیزی یاشاییر

                                             یوزوم یئرینده باسدیریلمیش

                                             چؤزوم یئرینده دویونله نمیش.

بویلو آنلاریمین دوغوم سانجی سی!

بئیین یاریم کوره سی

یوخسا کؤنول کوره سینده

                    یوغوروب

                    دوغوردونوز

                   ایچیمده کی «عوصیانچی سؤزجوکلری». 



قایناق:http://uchluk.blogfa.com

آردینی اوخو
چهارشنبه 13 آبان 1394
بؤلوملر : زامان پاشازاده,

موغان اوغلو (تله سی قارداش)

0 گؤروش
یازار:‌ شعر اوجاغی

احتیاط      ایگیدین     یاراشیقیدیر-

چوخدور بو دونیانین تله سی قارداش،

اینا نکی اویونبا ز اوغرو یول کسن-

یامان چوخالیبدیر ائله سی  قارداش،

 

چوخلاری دانیشیر  یورولمور   انگی،

قوزو   . جاناوارا   باسیــــــر اوزنگی،

سینه سینه دویه ن شیری  پلنگی،

 آلدادیر چوللرین ده له سی قارداش.

 

تولکو   سورو چکیب  داغا .  آپاریر،

دوه نی خیخیردیب  باغا   .  آپاریر،

نوکرین    موزدونو       آغا .    آپاریر،

آرتیر یازیقلارین شله سی قارداش.

 

دورنا قاناد چالیر    بولاغا    چاتمیر،

آت دورد نالا قاچیر  اولاغا   چاتمیر،

ائله قیشقیریرسان  قولاغا چاتمیر،

(موغان اوغلو)یانیر بئله سی قارداش.

...............................................

 

 

((tələsi qardaş

 

 

Ehtiyat    .  igidin    .  yaraşiqidir-

Çoxdur.budünyanin tələsi qardaş.

Inanki  oyunbaz . oğru.yol kəsən-

Yaman    çoxalibdir  eləsi qardaş.

 

Çoxlari   danişir   yorulmur  .əngi.

Quzu    canavara  basir  . üzəngi.

Sinə sinə    döyən   .  şiri pələngi-

Aldadir   çollərin    dələsi  qardaş.

 

Tülkü  suru  çəkib   dağa .aparir.

Dəvəni   xixirdib    bağa   .aparir.

Nökərin   muzdunu   ağa .aparir-

Artir   yaziqlarin    şələsi   qardaş.

 

Durna qanad çalir bulağa.Çatmir.

At .dörd nala qaçir ulağa .çatmir.

Elə  . qişqirirsan  qulağa. çatmir-

(muğanoğlu) yanir beləsi qardaş.

قایناق شاعیرین اؤز وبلاگی http://muqhanoqhlo.blogfa.com/




آردینی اوخو
پنجشنبه 23 مهر 1394
بؤلوملر : موغان اوغلو,

عربلی "جاوان اولسایدیم اگر"

0 گؤروش
یازار:‌ شعر اوجاغی

  "جاوان اولسایدیم اگر"

منده دیللرده اولاردیم جاوان اولسایدیم اگر

دایما بورس دا قالاردیم جاوان اولسایدیم اگر

بنزه دردیم  باشیمی هوروکلو قیزلار ساچینا

ساققالی گونده یولاردیم جاوان اولسایدیم اگر

دار بولوز یاماخلی شالواری تاخاردیم بدنه

کوچه ده فیشقا چالاردیم جاوان اولسایدیم اگر

باغلیاردیم قولوما زنجیری آفریقالی تک

قولاغا حلقه سالاردیم جاوان اولسایدیم اگر

آلدیراردم قاشیمی نشانلی قیزلار سایاغی

خیاباندا دولاناردیم جاوان اولسایدیم اگر

ائوده یارانه آلاندا نئجه غوغا یارادیب

تئز قاچیب شارژ آلاردیم جاوان اولسایدیم اگر

اس ام اس یوللیاراق قیزلارین ایرانسلینه

گوروشه چاره قیلاردیم جاوان اولسایدیم اگر

درسه خاطر بو گوزل عمرو هدر وئرمزیدیم

پول وئریب مدرک  آلاردیم جاوان اولسایدیم اگر

حامیا بللی دی قارداش ساوادین یوخ دیری

پارت تاپیب لاپ اوجالاردیم جاوان اولسایدیم اگر

دوستلاریملا ییغیشب گونده ایچردیم چاخیری

مست اولوب خالقی دولاردیم جاوان اولسایدیم اگر

باش قیزاندا ایتیرردیم اودم انسانلیغیمی

وئریب آغیز آغیزا اولاردیم جاوان اولسایدیم اگر

گیجه لیب قی ائلیردیم مزه نی همیده میی

یادا ..................... بولاردم جاوان اولسایدیم اگر

کوچه لردن کچن آنلاردا توتولمازدیم ایته

بلکه هورجک پاچالاردیم جاوان اولسایدیم اگر

ییخماغا قویمازیدیم قامتی عمرون کولگی

اییلرکن هاچالاردیم جاوان اولسایدیم اگر

عارین عارسیز یاشایاردیم بو گوزل دونیاده

سانما بیرده قوجالاردیم جاوان اولسایدیم اگر


قایناق: شاعیرین اؤز وبلاگی http://arabli.arzublog.com/



 

آردینی اوخو
چهارشنبه 22 مهر 1394

" دئسم اولدوروللر دئمه سم اوللَم " (سید جلیل "سید")

0 گؤروش
یازار:‌ شعر اوجاغی

 

    " دئسم اولدوروللر دئمه سم اوللَم  "

 




کوسگون اورییمدن سوروشان کسیم

تـوتـولوب بـوغازیـم کسیلیب سسیــم

گیزلین بیر غمیم وار عومورلوک بسیم

دئسم اولدوروللر دئمه سم اوللَم

 

دیدیــر اورییمــی، یاریـر سینه می

بیر اوگئی گورورم دوغما ننه می

آچیم اوره ییمی آچیم سنه مــــی

دئسم اولدوروللر دئمه سم اوللَم

 

دانیشسام بلکه ده طالعیم چاشــــار

دینمه سم نیسگیلیم باشیمدان آشار

دوداغیم سوسسا دا گوزومدن داشار

دئسم اولدوروللر دئمه سم اوللَم

 

بیلمیــرم یاشاییم بیلمـــــیرم اولوم

قوی ایتیم گوزلردن من ایلیم-ایلیم

گؤرورم دئمه گه یوخومدور دیلیم

دئسم اولدوروللر دئمه سم اوللَم

 

نئجه گؤر گؤزوندن باتیبدی دونیا

داغـــلاری دره یه ساتیبـدی دونیا

یـوکـونـو بئلیمـه چاتیبــدی دونیا

دئسم اولدوروللر دئمه سم اوللَم

 

" سیّدم " گؤرمه گه  قورخورام دوزو

مثل وار:« چیخاجاق گؤره نین گؤزو»

قـورخـو پرده سینده گیزله نن سـؤزو

دئسم اولدوروللر دئمه سم اوللَم

                                                       (سید جلیل "سید")

قایناق: http://ganligunash.blogfa.com/


آردینی اوخو
چهارشنبه 22 مهر 1394
بؤلوملر : میرجلیل "سیّد",

میرجلیل"سیّد" "عؤمور یولو"

0 گؤروش
یازار:‌ شعر اوجاغی

                                     "عؤمور یولو"

 

آددیم- آددیم اینسان  اوغلو

آددیم لاییـــر  عؤمور یولون .

عؤمور نه دیر

عؤمور دئمک

                  ایپک قاناد بیر دویغودور  

                  خیال لارین  قوجاغیندا .

آددیم لانیــــر عؤمور یولو

عؤمور واردیر بیر آددیمی

مین- مین آددیم دالغالی دیر

عؤمور واردیــــر مین آددیمی

نه ایزلی دیـــر ، نه توزلودور .

عؤمور نه دیر

عؤمور دئمک

   بیر مورگودور کائیناتین

   گـــؤزلرینیــن ببه گینده

   ایلک محبت لایلاسی تک

   سون باخیشین دالغاسی تک .

عؤمور نه دیر

عؤمور دئمک

    هر اینسانین

    آلا تـوران بیـــر سحرده

    قاطارلانمیش آرزوسونون

    حقــّــه دوغرو گئدن ایزده 

    الدن چیخمیش  اوساریدیر .

عؤمور نه دیر

عؤمور دئمک

    قیوریم- قیـوریم آرزو تئلی

    دالغا- دالغا دوشـونجه دیر

    سونسوز خیال دنیـز ینده .

عؤمور نه دیر

عؤمور دئمک

    دوشونجه نین آددیم لانمیش

    ایزلرینین

    یولدا قالمیش بیر توزودور .

         عؤمور زامان اؤلچوسودور

         زامان عؤمور قایچی سی دیر .

                            (میرجلیل"سیّد" ، 28/1/70)


قایناق: http://ganligunash.blogfa.com/

آردینی اوخو
شنبه 18 مهر 1394
بؤلوملر : میرجلیل "سیّد",