بو دونیادا تاجی شاه-دان،شیخ آلیر بوردا آجین الیندهکین توخ آلیر بودونیانین آغریلاری چوخالیر خئییر دئییب توتولورسان شره سن اودونیادا بئلهدیرمی گؤرهسن! ائشیدسکده دوز،اوزولمور، اینجهلیر ایندی داها "گوج قانونا گوج گلیر" ایری دوزون یاتاغیندا دینجهلیر حاق سؤزونله چکیلیرسن داراسن اودونیادا بئلهدیرمی گورهسن! دیلیندن، دینیندن آسیلیر چوخو آوتامات سسینده محو اولور یوخو هئی دئدی-قودو، هئی قارا-قورخو یاتیریق قورخولو، دورروق هاراسان او دونیادا بئلهدیرمی گؤرهسن! آنا کؤرپهسینه کفن بلهییر قوردون جایناغیندا قوزو ملهییر بیر آلچاق امرائدیر مینی باش اییر دیرمی بو سایاق عؤمور سورهسن؟ او دونیادا بئلهدیرمی گؤرهسن! کؤنول! سئومیجک سنی بو لووغا ایسترسن بوروندور اطلاز دووآغا دؤندر بارماغینی قیزیل داراغا گلین کیمی تئللرینی داراسن کامیل اودور،عذابداندا کام آلا نؤقصانلارلا چاتمالیسان کمالا جواب ایچین دونیا بویدا سوالا داریخیرسان بیر داریسقال گوراسن او دونیادا بئلهدیرمی گؤرهسن! یاشاماقچون دوغولساندا دونیایا هوس ایچره بوغولساندا دونیایا سؤیکنجک داغ اولساندا دونیایا اجل گلدی،گئتملیسن اوراسن او دونیادا بئلهدیرمی گؤرهسن! وای او گونه اورا بوردان پیس چیخا دیکتاتورلار، ملکلرله دوست چیخا ایشین دوشه نامردلره، آلچاغا یاغیشلاردان، یاغمورلارا گیرهسن او دونیادا بئلهدیرمی گؤرهسن! پئشمانلیغین نه خئیری نه ثمری! ایچین گئده بو دونیادان اؤتری قاییتماغا یولون اولماز هئچ گئری هئی دؤیسنده تپیگینی یئرهسن او دونیادا بئلهدیرمی گؤرهسن! اودورکو قاییتمیر گئدنلر گئری بیلینمیر مکانی بیلینمیر یئری قاییتمیر گؤرهسن اؤلودور، دیری قاییتمیر ائی بئله سورغو وئرهسن او دونیادا بئلهدیرمی گؤرهسن! ائشید اولو تانریم،ائشید سسیمی دئمیرمکی قایتار عزیز کسیمی راپورت ائتمک ایچین لاپ پیس مال کیمی او دونیادان قایتار بیرین بوراسن او دونیادا بئلهدیرمی گؤرهسن! او دونیادا بئلهدیرمی گؤرهسن!
نیلیم ...
بو دوران فلاکت ده
دئیین خوار اولماییم نیلیم
حیاتیم رنج و محنت ده
دل افگار اولماییم نیلیم
ساغیم اوغرو سولوم اوغرو
نه اینصاف وار نه ده دوغرو
قان اولدو یوخسولون باغری
باخیب زار اولماییم نیلیم
گلیر آز خرجیم آنجاق چوخ
الیم بوش جیبده بیر زاد یوخ
نه حالیم ساز نه قارنیم توخ
طلبکار اولماییم نیلیم
یوزه قیرخ بهره واملاردا
بیزیم درده باخان هاردا
اودور داییم قالیب داردا
گرفتار اولماییم نیلیم
کئچیب دیر قسطیم حددیندن
بوگون بانکلار اوزاق دیندن
اوزه دوشموش بو ضامین دن
شرمسار اولماییم نیلیم
کاسیبلیق جان آلان یئرده
اوره ک هر دم دولور درده
دئییم بو یاشدا بی پرده
گوناهکار اولماییم نیلیم
قایناق: شاعیرین اؤز وبلاگی http://arabli.arzublog.com/
قیرتله بوتون باش اوجالاندیر آراز اوغلوم
هر یئرده گوزل بو آنامین نازلی دیلینده
شعرین اوجاغین سن بئله یاندیر آراز اوغلوم
ائل گولسه اوغول گولگیله ائل آغلاسا آغلا
وارلیق کمرین سعی ائله محکم بئله باغلا
بیرسئل کیمی جوشغون اولاسان آخگیلاچاغلا
شعرین اوجاغین سن بئله یاندیر آراز اوغلوم
دوزیول گئده سن دوزگئده نین یول لارین ایزله
دوسلوق ائله سون دوسلارووا باخ کی بیر اوزله
سلطان غزل گر اولاسان حورمتی گوزله
شعرین اوجاغین سن بئله یاندیر آراز اوغلوم
عمرونده گلیب هئچ کیمه قیسقان چی لیق ائتمه
چاغریلمامیش هئچ مجلیسه هئچ بیریئره گئتمه
چال یاخشی چالیش یوخسا اوزونده قالیب ایتمه
شعرین اوجاغین سن بئله یاندیر آراز اوغلوم
فیکرین اوباسین علمیله عقلیله گئنیش سال
سوز بایراغینی لاپ اوجالیغلاردا آپار چال
قیرتلی بابام تک ایگید اول سنده ایگید قال
شعرین اوجاغین سن بئله یاندیر آراز اوغلوم
فریاده سنی هاردا وطن سسلسه سس وئر
بوتورپاغین اولادی کیمین عشقه نفس وئر
جان ایسته سه یوردوم گوزه لیم دورما تلس وئر
شعرین اوجاغین سن بئله یاندیر آراز اوغلوم
خلقین ناموسوندان دایاق اول یاخشی شرفله
حورمتلی حیات سورگیله دائیم دوزهدفله
گول زارووی قویما قاریشا هرزه علفله
شعرین اوجاغین سن بئله یاندیر آراز اوغلوم
سوز جوهرینی آلگیلا زرگر اونی ساتسا
صبرائیله گیلن طالعییوون اولدوزو باتسا
عمرون بوحیات دا اوزون اولسا یادا قیسا
شعرین اوجاغین سن بئله یاندیر آراز اوغلوم
چک قاش گوزونه اوز دیلیمین یار کیمی سورمه
جان وئر او آنام وئردیگی لای لای سینی وئرمه
شعرین اوجاغین سن بئله یاندیر آراز اوغلوم
بو شهرین -
اوستو اورتولو بازاریندا،
هر شئین اوستو اورتولودور،
هممشه بئلهدیر:
« اورتولو بازار،! دوسلوقو پوزار »
ثانیه لره باغلی فیرلانان،
ساحات بازاری-
حیات بازاری-
دولاندیق هفته بازارلاری،
یئل چرشنبه سینده، توز قوپدو!
آی،! گوزگو،! آیدینلیقدیر دیه:
سو چرشنبه سینده!
سویا دویونله دیک، آرزیلار مورادین.
اود چرشنبه میز، قارا دوشدو!
.....
دونیا بازارینا چیخدیق،
خرمن-خرمن یوکلنمیش،
کاروانی چکدیک.
ایچی یونولموش چکی داشی ایلا،
مرجی – ماشی!
اَیــری آرشینلا، آل قوماشـــی،
گون باتاندا ساتدیق.
گون چیخاندا آلدیق،
دولمادی چوالیمیز،
چیرکی گوروندو پارامیزین،
گوینهدی قابارلی اَللریمیز،
سیزلادی یارامیز! . . . ساریقسیز.
چاریقسیز،
اؤتدو آذر، بهمن کیشی!
گلدی، بایرام – نووروز- حاج فیروز!
هلهده . . . ! باخیــریـق،
« تکهم – تکهم » اوینونا.
.......................
قایناق: شاعیرین اؤز وبلاگی http://www.golargoja.blogfa.com/